ബംഗലുരു: ബുക്കനിക്കര സിദ്ധലിംഗപ്പ യെദ്യൂരപ്പ, കര്ണാടക ബിജെപിയുടെ ജീവവായു. ദക്ഷിണേന്ത്യയില് ഭാരതീയ ജനതാ പാര്ട്ടിയെ ആദ്യമായി ഭരണത്തിലേക്ക് കൈപിടിച്ച് ഉയര്ത്തിയ അതികായന്. മാണ്ഡ്യ സ്വദേശി ആണെങ്കിലും കര്മ്മരംഗമായി തെരഞ്ഞെടുത്തത് ഷിമോഗ ജില്ലയെ.
രാഷ്ട്രീയ സ്വയംസേവക സംഘത്തിലൂടെയാണ് യെദ്യൂരപ്പ പൊതുപ്രവര്ത്തന രംഗത്തേക്ക് എത്തിയത്. മദ്ധ്യ കര്ണാടകയിലെ കര്ഷക പ്രശ്നങ്ങള് പരിഹരിക്കാന് സജീവമായി നിലകൊണ്ട യെദ്യൂരപ്പ, ജനസംഘത്തിന്റെയും പിന്നീട് ബിജെപിയുടെയും സംസ്ഥാനത്തെ മുന്നണി പോരാളിയായി മാറിയത് വളരെ വേഗമാണ്. അടിയന്തരാവസ്ഥ കാലത്ത് ജനാധിപത്യ സംരക്ഷണത്തിനായി പോരാടി ജയില് വാസം അനുഷ്ഠിച്ചു. അര്ഹതയ്ക്കുള്ള അംഗീകാരം എന്ന നിലയ്ക്ക് 1988 ല് യെദിയൂരപ്പയെ തേടിയെത്തിയത് ബിജെപി സംസ്ഥാന അധ്യക്ഷ സ്ഥാനം.
https://www.youtube.com/watch?v=BJOBix5uX7o
ശിക്കാരിപുരയില് നിന്ന് തുടര്ച്ചയായി നിയമസഭയില് എത്തിയ അദ്ദേഹം 2004ല് പ്രതിപക്ഷ നേതൃസ്ഥാനം ഏറ്റെടുത്തു. കുമാരസ്വാമി സര്ക്കാരില് ഉപമുഖ്യമന്ത്രിയും പിന്നീട് ധനമന്ത്രിയുമായി. ചരിത്രം രചിച്ചു 2007 നവംബര് 12ന് കന്നഡ നാട്ടിലെ ബിജെപിയുടെ ആദ്യ മുഖ്യമന്ത്രി ആയെങ്കിലും, ജെഡിഎസ് പിന്തുണ പിന്വലിച്ചതോടെ 7 ദിവസം മാത്രമേ സ്ഥാനത്തു തുടരാനായുള്ളു. ജനതാദള് എസ് കാണിച്ച നീതികേട് വോട്ടായി മാറിയപ്പോള് ബിജെപി കര്ണാടകയില് വീണ്ടും അധികാരത്തിലേറി. 2008 മെയ് 30 ന് മുഖ്യമന്ത്രിയായി വീണ്ടും സത്യപ്രതിജ്ഞ ചെയ്തു യെദ്യൂരപ്പ അധികാരമേറ്റു.
പ്രതിസന്ധികളെ അതിജീവിച്ച് വിജയ പഥത്തില് എത്താനുള്ള കഴിവാണ് ബിഎസ് യെദ്യുരപ്പയെ മറ്റ് നേതാക്കളില് നിന്ന് വ്യത്യസ്തനാക്കുന്നത്. നെറ്റിയിലെ സ്ഥിരം സാന്നിധ്യമായ കുങ്കുമ പൊട്ടിനൊപ്പം പ്രസരിക്കുന്ന ഊര്ജം കര്ണാടക ബിജെപിക്ക് നല്കുന്ന ആത്മവിശ്വാസം ചെറുതല്ല.