IndiaDefence

അഭിമാന നിമിഷം : ചൈന മുഴുവൻ ഇന്ത്യയുടെ പരിധിയിൽ : അഗ്നി 5 പരീക്ഷണം വീണ്ടും വിജയം

ന്യൂഡൽഹി : ഭാരതത്തിന്റെ ദീർഘദൂര ഭൂഖണ്ഡാന്തര ബാലിസ്റ്റിക് മിസൈൽ അഗ്നി-5 വീണ്ടും വിജയകരമായി പരീക്ഷിച്ചു. ഒഡിഷ തീരത്തോടു ചേർന്നുളള കലാം ദ്വീപിൽ നിന്നാണ് ഡി.ആർ.ഡി.ഒ അഗ്നിയുടെ ആറാമത് പരീക്ഷണം വിജയകരമായി പൂർത്തിയാക്കിയത്. ഇന്ന് 9:48 നായിരുന്നു പരീക്ഷണം

ഭാരതത്തിന്റെ പ്രതിരോധവ്യൂഹത്തിൽ കരുത്തുറ്റ മുതൽക്കൂട്ടാകും അണുവായുധ വാഹകശേഷിയുളള അഗ്നി-5 എന്ന് ശാസ്ത്രജ്ഞർ വിലയിരുത്തുന്നു. ഏതാനും പരീക്ഷണനിരീക്ഷണങ്ങൾ കൂടി കഴിഞ്ഞാൽ അഗ്നി-5 ഭാരതസൈന്യത്തിന്റെ ഭാഗമാകും.

17 മീറ്റർ നീളവും 2 മീറ്റർ വ്യാസവും 50 ടണ്ണോളം ഭാരവുമുളള അഗ്നി-5 അയ്യായിരം കിലോമീറ്റർ ദൂരപരിധിയിൽ നാശം വിതയ്ക്കാൻ കഴിവുളളതാണ്. ഒരു ടണ്ണിലേറെ ഭാരമുളള ആണവപോർമുനകളെ വഹിക്കാൻ പര്യാപ്തമായ ഇതിൽ അഗ്നിയുടെ മുൻതലമുറ മിസൈലുകളിൽ നിന്നും വ്യത്യസ്തമായി വിവിധ ആധുനിക സാങ്കേതികവിദ്യകളും ഉൾക്കൊളളിച്ചിട്ടുണ്ട്. ഗതിനിർണ്ണയം, യുദ്ധമുന, എഞ്ചിൻ എന്നീ വിഭാഗങ്ങളിൽ പുതിയ സാങ്കേതികവിദ്യയാണ് ഉപയോഗിച്ചിട്ടുളളത്.

ഭാരതം മിസൈൽ സാങ്കേതികവിദ്യാനിയന്ത്രണ ഗ്രൂപ്പിൽ അംഗത്വം നേടിയതിനു ശേഷമുളള മൂന്നാമത്തെ മിസൈൽ പരീക്ഷണമാണിത്. 1000 കിലോയിലധികം ഭാരമുളള അണുവായുധവും വഹിച്ച് 5,000 കിലോമീറ്ററുകൾക്കപ്പുറമെത്താൻ പര്യാപ്തമായതാണ് അഗ്നി-5 മിസൈലുകൾ. ഇത് പാകിസ്ഥാനും, ചൈനയുമടക്കം ഏഷ്യയുടെ ഏതാണ്ട് എല്ലായിടത്തും ലക്ഷ്യം കാണുവാൻ പ്രാപ്തമായതാണ്.

ഏതു കാലാവസ്ഥയിലും ലക്ഷ്യം പിഴയ്ക്കാതെ തൊടുക്കുവാൻ പര്യാപ്തമായ സാങ്കേതികവിദ്യയാണ് അഗ്നി-5നുളളത്. ലോഞ്ചിംഗ് പാഡുകളിൽ നിന്നോ, വാഹനങ്ങളിൽ നിന്നോ തൊടുക്കുവാൻ കഴിയുന്ന അഗ്നി-5; 17 മീറ്റർ നീളവും, 50 ടൺ ഭാരവുമുളള അതിവേഗ മിസൈലാണ്.ഫയർ ആൻഡ് ഫർഗോട്ട് സിസ്റ്റം എന്നു വിശേഷിപ്പിക്കുന്ന സാങ്കേതികവിദ്യ ഉപയോഗിച്ചിരിക്കുന്ന അഗ്നി-5, റഡാറുകൾക്കും മിസൈൽ പ്രതിരോധ സംവിധാനങ്ങൾക്കും പെട്ടെന്നു കണ്ടെത്താൻ സാധിക്കുന്നതല്ല.

ഭാരതത്തിന് നിലവിൽ അഗ്നി-1, 2, 3, 4 എന്നിങ്ങനെ 4 തലമുറ അഗ്നി മിസൈലുകളും, ബ്രഹ്മോസ് സൂപ്പർ സോണിക് ക്രൂയിസ് മിസൈലുകളും സ്വന്തമായുണ്ട്. 700 കിലോമീറ്റർ ആക്രമണപരിധിയുളള അഗ്നി-1, രണ്ടായിരം കിലോമീറ്റർ റേഞ്ചുളള അഗ്നി-2, 2,500 മുതൽ 3,500 കിലോമീറ്ററുകളിലേറെ പ്രഹരശേഷിയുളള അഗ്നി-3, അഗ്നി-4 എന്നിവയാണിപ്പോൾ സൈന്യം ഉപയോഗിച്ചു വരുന്നത്.

സമാധാനത്തിനുളള ആയുധം എന്നാണ് ഭാരതം അഗ്നി-5നെ വിശേഷിപ്പിച്ചിട്ടുളളത്. അഗ്നി-6 ന്റെ നിർമ്മിതിക്കു വേണ്ടിയുളള പ്രാരംഭ പ്രവർത്തനങ്ങളിലാണ് ഡി.ആർ.ഡി.ഒ. അഗ്നി-6ന്റെ ദൂരപരിധി 8,000 കിലോമീറ്റർ മുതൽ 10,000 കിലോമീറ്റർ വരെയായിരിക്കുമെന്നാണ് വിവരം.

12K Shares

Please scroll down for comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Close
Close