അവസാന ജീവശ്വാസവും തങ്ങൾക്ക് നൽകി മരണത്തിലേക്ക് മറഞ്ഞവന് അമരത്വം നൽകാനൊരുങ്ങുന്നു തായ് ഗുഹയിൽ അകപ്പെട്ട കുട്ടികൾ.
തായ് നാവിക സേനയിലെ മുൻ മുങ്ങൽ വിദഗ്ദൻ സമൻ ഗുനാൻ ഗുഹയില് കുടുങ്ങിയവര്ക്ക് ഓക്സിജന് നല്കി തിരികെ വരുന്നതിനിടയില് സ്വന്തം ശേഖരത്തിലെ ഓക്സിജന് തീർന്നാണ് മരണപ്പെട്ടത്.
കുട്ടികൾ സന്യാസം സ്വീകരിച്ചാൽ സമന് അമരത്വം ലഭിക്കുമെന്നാണു വിശ്വാസം. സെർജന്റ് സാം എന്ന പേരിൽ ലോകമെങ്ങും അറിയപ്പെടുന്ന സമനു വേണ്ടി ഗുഹയിൽ നിന്ന് രക്ഷപ്പെട്ട കുട്ടികൾ സന്യാസം സ്വീകരിക്കാൻ ആലോചിക്കുന്നതായി കുട്ടികളിലൊരാളുടെ കുടുംബാംഗം തന്നെയാണ് വെളിപ്പെടുത്തിയത്.
ബുദ്ധമത വിശ്വാസപ്രകാരം സന്യാസവ്രതം സ്ഥിരമല്ല. ലൗകിക ജീവിതത്തിലേക്കു മടങ്ങിവരാൻ ബുദ്ധമതം അനുവദിക്കുന്നുമുണ്ട്.
