ന്യൂഡൽഹി ; ബോംബുകളും,മിസൈലുകളും വഹിക്കാൻ ശേഷിയുള്ള അത്യാധുനിക നിരീക്ഷണ ഡ്രോണുകൾ ഇന്ത്യയ്ക്ക് കൈമാറാനൊരുങ്ങി അമേരിക്ക. മിസൈൽ വിക്ഷേപണത്തിനു പോലും കഴിയുന്ന ഡ്രോണുകളാണിവ.
കേവലം ഒരു നിരീക്ഷണ ഡ്രോൺ എന്നതിലുപരിയായി കരയിലും സമുദ്രത്തിലുള്ള ലക്ഷ്യസ്ഥാനങ്ങളെ ഉന്നം വയ്ക്കാൻ സാധിക്കുന്ന ഡ്രോണുകളാണ് ആവശ്യമെന്ന് ഇന്ത്യൻ സേന വ്യക്തമാക്കിയിരുന്നു.
നാറ്റോ സഖ്യത്തിനു പുറമേയുള്ള രാജ്യത്തിനു അമേരിക്ക സാധാരണയായി ഇത്തരം ഡ്രോണുകൾ നൽകാറില്ല. എന്നാൽ കഴിഞ്ഞ ഏപ്രിലിൽ ആയുധ കയറ്റുമതി നയത്തിൽ ട്രംപ് ഭരണകൂടം നിർണായകമായ മാറ്റം കൊണ്ടുവന്നിരുന്നു. ഇതനുസരിച്ച് മിസൈൽ വിക്ഷേപണത്തിനും,നിരീക്ഷണത്തിനും കരുത്തുള്ള ഡ്രോണുകൾ ഇന്ത്യയ്ക്ക് നൽകാനാണ് തീരുമാനം.
നേരത്തെ അമേരിക്കയുടെ പ്രെഡേറ്ററുകൾ വാങ്ങാൻ ഇന്ത്യ തീരുമാനിച്ചിരുന്നു. പ്രധാനമന്ത്രി നരേന്ദ്ര മോദിയുടെ അമേരിക്കൻ സന്ദർശനത്തിനിടെയാണ് പ്രെഡേറ്റർ വിൽപന കരാർ സംബന്ധിച്ച ധാരണയായത്. ഇതുമായി ബന്ധപ്പെട്ടുള്ള വിവരങ്ങളും രേഖകളും അമേരിക്ക ഇന്ത്യയെ അറിയിച്ചിരുന്നു.
52,000 കോടി രൂപ വില വരുന്ന പ്രെഡേറ്ററുകൾ ഇന്ത്യൻ വ്യോമസേനയ്ക്ക് നൽകുന്ന കാര്യമാണ് തീരുമാനിച്ചത്.
ജനറൽ അറ്റോമിക്സാണ് പ്രെഡേറ്റർ നിർമിക്കുന്നത്.ആയുധങ്ങൾ വഹിക്കാൻ ശേഷിയുള്ള എംക്യു–9 റീപ്പർ എന്ന പേരിലുള്ള പ്രെഡേറ്റർ ഡ്രോണുകളാണ് നിര്മിക്കുന്നത്.
ന്യൂഡൽഹിയിൽ ഇരുന്ന് പാക്കിസ്ഥാൻ നഗരങ്ങളിൽ എവിടെ ആക്രമിക്കണമെന്ന് വരെ നിയന്ത്രിക്കാൻ കഴിയുന്നതാണ് ഈ ഡ്രോണുകൾ.
