ന്യൂഡൽഹി : ലോകത്തിലെ ഏറ്റവും കരുത്തേറിയ ലിഫ്റ്റ് ഹെലികോപ്റ്റർ ചിനൂക് ഇന്ത്യൻ വ്യോമസേനയ്ക്കായെത്തുന്നു.ഇതു പറത്തുന്നതിലെ വിദഗ്ദ്ധ പരിശീലനത്തിനായി സേനാംഗങ്ങൾ തെതർലൻഡ്സിലെത്തി. നിർമ്മാതാക്കളായ ബോയിംഗ് കമ്പനിയുടെ നേതൃത്വത്തിൽ ഈ മാസമാദ്യമാണ് പരിശീലനം ആരംഭിച്ചത്.
അഫ്ഗാൻ,ഇറാഖ്,വിയറ്റ്നാം യുദ്ധങ്ങളിൽ യുഎസ് സേനയ്ക്ക് കരുത്ത് പകർന്നത് ചിനൂക് വിമാനങ്ങളാണ്.15 വിമാനങ്ങളാണ് ബോയിംഗിൽ നിന്ന് ഇന്ത്യ വാങ്ങുക.വാഹനങ്ങളെത്താത്ത ദുർഘടമായ ഇടങ്ങളിലേക്ക് സേനയ്ക്കാവശ്യമായ ആയുധങ്ങൾ,യന്ത്രങ്ങൾ എന്നിവ എത്തിക്കാൻ ചിനൂകിനു കഴിയും.യുദ്ധസ്ഥലങ്ങളിലേക്ക് വളരെ പെട്ടെന്ന് വളരെ കൂടുതൽ സേനയെ എത്തിക്കാൻ ചിനൂകിനു സാധിക്കും.
ചിനൂക് ചി എച്ച്-എഫ് ഹെലികോപ്റ്ററിന്റെ നവീന പതിപ്പാണ് ഇന്ത്യ വാങ്ങുക.9.6 ടൺ സാമഗ്രികൾ വഹിക്കാനുള്ള ശേഷി ചിനൂകിനുണ്ട്.
മണിക്കൂറിൽ 315 കിലോമീറ്ററാണ് പരമാവധി വേഗം.6100 അടി ഉയരത്തിൽ പറക്കാൻ സാധിക്കും.പ്രതിരോധ മേഖലയ്ക്ക് കൂടുതൽ കരുത്ത് പകർന്നാകും ചിനൂക് എത്തുക.