ഓഹരികള് വാങ്ങാന് കൂടുതല് ഡിസ്ക്കൗണ്ട് സേവനങ്ങളുമായാണ് പേടിഎം എത്തുന്നു. മൊബൈല് പണമിടപാട് സ്ഥാപനമായ പേടിഎമ്മിന്റെ ഇന്വെസ്റ്റ്മെന്റ് ആന്ഡ് വെല്ത്ത് മാനേജ്മെന്റ് വിഭാഗമായ പേടിഎം മണി സ്റ്റോക് സേവന രംഗത്തേക്ക് വരികയാണ്. പേടിഎം സി.ഇ.ഒ. വിജയ് ശേഖര് ശര്മയാണ് ഏതാനം മാസങ്ങള്ക്കുള്ളില് സ്റ്റോക് ബ്രോക്കിങ്ങ് സേവനം നിലവില് വരുമെന്ന് അറിയിച്ചത്.
ഓഹരി വിപണി നിയന്ത്രണ ബോര്ഡായ ‘സെബി’യുടെ അനുമതി കമ്പനിക്ക് ലഭിച്ചു. കൂടാതെ ബി.എസ്.ഇ, എന്.എസ്.ഇ എന്നിവയില് നിന്നും അംഗത്വം ലഭിച്ചു കഴിഞ്ഞു. ഡിസ്കൗണ്ട് ബ്രോക്കിങ്ങ് സേവനമായിരിക്കും കമ്പനി ഒരുക്കുകയെന്നാണ് സൂചന. പേടിഎം മണി ആപ്പ് മൊബൈലിലുള്ള എല്ലാ ഉപഭോക്താക്കള്ക്കും സ്റ്റോക്കുകള് വളരെ എളുപ്പത്തില് വാങ്ങാനും വില്ക്കാനും സാധിക്കുന്ന രീതിയിലാകും പദ്ധതി നടപ്പിലാക്കുക എന്ന് കമ്പനി അറിയിച്ചു. ഓഹരി വിപണിയിലെ ഒരു സുപ്രധാന മാറ്റത്തിന്റെ തുടക്കമാകും പേടിഎമ്മിന്റെ സ്റ്റോക്ക് ബ്രോക്കിംഗ് എന്നാണ് വിലയിരുത്തലുകള്.
നിലവില് പേടിഎം മണിയിലൂടെ മ്യൂച്വല്ഫണ്ടുകള് വാങ്ങാന് സാധിക്കും. പേടിഎം മണി വഴി സ്വര്ണ വ്യാപാരവും നടത്താവുന്നതാണ്. സ്വര്ണ വ്യാപാരത്തിനുള്ള അനുമതിയും പേടിഎം നേരത്തേ തന്നെ നേടിയിരുന്നു. രാജ്യത്തെ ഏറ്റവും വലിയ ഡിജിറ്റല് പെയ്മെന്റ് കമ്പനിയാണ് ‘പേടിഎം’. നിലവില് 25 കോടി ഉപയോക്താക്കളുണ്ടെന്നാണ് കണക്കുകള്.
