ഒരു പാവം ജീവി , ഈ ചിന്തയോടെയാണ് തന്റെ മുഖത്തേയ്ക്ക് ഒരു നീരാളിയെ ജാമി എടുത്ത് വച്ചത് . ഫോട്ടോ എടുക്കുകയായിരുന്നു ഉദ്ദേശ്യം . പക്ഷെ അധികം വൈകാതെ ജാമിയ്ക്ക് ഒരു കാര്യം മനസ്സിലായി നീരാളി വെറും പാവമല്ല .
വാഷിംഗ്ടണിലെ ടകോമ പാലത്തില് നടന്ന ചൂണ്ടയിടൽ മൽസരത്തിന് എത്തിയപ്പോഴായിരുന്നു അപകടം. മുഖത്ത് എടുത്ത് വച്ച നീരാളിയുടെ ഗ്രാഹി ജാമിയുടെ മുഖത്ത് ആഴ്ന്ന് ഇറങ്ങുകയായിരുന്നു .
വേദന സഹിക്കാനാകാതെ ജാമി ഉടൻ നീരാളിയെ കുടഞ്ഞെറിഞ്ഞു . മുഖത്ത് നിന്ന് രക്തം വാർന്ന് ഒഴുകുന്ന നിലയിലാണ് ജാമിയെ ആശുപത്രിയിലെത്തിച്ചത് .
കാഴ്ചയിൽ പാവമായി തോന്നിയ ആ ജീവി ഉപദ്രവിക്കുമെന്ന് ഒരിക്കലും കരുതിയില്ല എന്നായിരുന്നു ജാമിയുടെ പ്രതികരണം. ‘‘ആദ്യം അത് എന്റെ മുഖത്ത് കളിക്കുകയായിരുന്നു. എന്റെ ചെവിയിലും മൂക്കിലും ഇഴഞ്ഞു നടന്നു. പിന്നീട് എന്റെ കവിളിലേക്ക് ഇറങ്ങി അതിന്റെ ഗ്രാഹികൾ ആഴ്ത്തി , മുഖത്തിന്റെ ഇടത് വശം തളർന്ന നിലയിലാണ് തോന്നുന്നത് .വേദനയും മരവിപ്പുമുണ്ട് ‘ – ജാമി പറഞ്ഞു.
ഒരു ചിത്രമെടുക്കാൻ കാട്ടിയ ഈ സാഹസം ജീവിതത്തിൽ ഒരിക്കലും മറക്കില്ലെന്നും ജാമി കൂട്ടിച്ചേർക്കുന്നു.
