ഗുവാഹത്തി: കാമുകിക്കൊപ്പം ആഡംബര ജീവിതം നയിക്കാനും വിലപിടിപ്പുള്ള സമ്മാനങ്ങള്‍ വാങ്ങിനല്‍കാനുമായി വീട്ടിലെ ലോക്കറില്‍ നിന്ന് 50 ലക്ഷം രൂപ മോഷ്ടിച്ച യുവാവ് അറസ്റ്റില്‍. അസം ജോര്‍ഹത്ത് സ്വദേശിയായ യഷ് ധനുക അഗര്‍വാള്‍ (25) ആണ് പിടിയിലായത്. വീട്ടില്‍ നിന്ന് പണവും സ്വര്‍ണവും മോഷ്ടിച്ച് അഹമ്മദാബാദിലേക്ക് കടന്ന ഇയാളെ പിതാവ് പിന്തുടര്‍ന്ന് പിടികൂടി പൊലീസില്‍ ഏല്‍പ്പിക്കുകയായിരുന്നു.
ഓഗസ്റ്റ് 11നാണ് കേസിനാസ്പദമായ സംഭവം. വീട്ടില്‍ ആരുമില്ലാത്ത സമയത്ത് എത്തിയ യഷ് പിതാവിന്റെ മുറിയിലെ ലോക്കര്‍ പൊളിച്ച് പണവും സ്വര്‍ണവും എടുത്ത് കടന്നുകളയുകയായിരുന്നു. ലോക്കര്‍ പൊളിക്കാന്‍ വെല്‍ഡിങ് തൊഴിലാളിയുടെ സഹായവും തേടിയതായി പൊലീസ് പറഞ്ഞു. മോഷണത്തിന് പിന്നാലെ അഹമ്മദാബാദിലേക്ക് കടന്ന പ്രതിയെ സൈബര്‍ സെല്ലിന്റെ സഹായത്തോടെ പൊലീസ് പിന്തുടര്‍ന്നു. ഇതിനിടെ പിന്നാലെയെത്തിയ പിതാവ് യഷിനെ കണ്ടെത്തി പിടികൂടുകയായിരുന്നു.
പുബലി ദത്ത എന്ന കാമുകിക്കായാണ് മോഷ്ടിച്ച പണത്തിന്റെ വലിയൊരു ഭാഗം ചെലവഴിച്ചതെന്ന് യഷിന്റെ മൊഴിയില്‍ പറയുന്നു. ഏകദേശം അഞ്ച് ലക്ഷം രൂപ ചെലവഴിച്ചതായും 1.5 ലക്ഷം രൂപ വിലവരുന്ന ഐഫോണ്‍ കാമുകിക്ക് വാങ്ങിനല്‍കിയതായും പൊലീസ് കണ്ടെത്തി. ബാക്കി തുക ഇരുവരും വിവിധ ഹോട്ടലുകളിലും റിസോര്‍ട്ടുകളിലും താമസിക്കാനായി ഉപയോഗിച്ചതായാണ് വിവരം.
ജിത്തു സോമനി, രോഹിത്ത് പ്രസാദ് എന്നിവരടക്കമുള്ളവരാണ് മോഷണത്തിന് പിന്നിലെന്നും ഇവരാണ് പണം മോഷ്ടിക്കാനുള്ള ആശയം നല്‍കിയതെന്നും യഷ് മൊഴി നല്‍കിയിട്ടുണ്ട്. ഇവരെയും കേസില്‍ പ്രതിചേര്‍ത്തിട്ടുണ്ട്. കാമുകിയെ വിശദമായി ചോദ്യം ചെയ്യാനൊരുങ്ങുകയാണ് പൊലീസ്. കേസിലെ മറ്റ് പ്രതികളെ കണ്ടെത്തുന്നതിനും മോഷണം പോയ പണവും സ്വര്‍ണവും വീണ്ടെടുക്കുന്നതിനുമുള്ള നടപടികള്‍ പുരോഗമിക്കുകയാണ്. ബിസിനസ് ആവശ്യത്തിനായി വീട്ടില്‍ സൂക്ഷിച്ചിരുന്ന പണത്തെക്കുറിച്ച് യഷിന് നേരത്തെ അറിയാമായിരുന്നുവെന്നാണ് കുടുംബത്തിന്റെ മൊഴി.
