വെനീസ് : ജോജു ജോര്ജിനെയും നിമിഷ സജയനെയും പ്രധാന കഥാപാത്രങ്ങളാക്കി സനല് കുമാര് സംവിധാനം ചെയ്ത ചോല എന്ന സിനിമ വെനീസ് ചലചിത്രമേളയില് പ്രദര്ശിപ്പിച്ചു.
ചലച്ചിത്ര മേളയിലെ മത്സരവിഭാഗങ്ങളില് ഒന്നായ ഓറിസോന്റ്റി മത്സരത്തിലേയ്ക്കാണ് ചിത്രം തിരഞ്ഞെടുക്കപ്പെട്ടത്. സിനിമ കാണാനായി വെനീസിലെത്തിയ ചോല ടീമാണ് ഇപ്പോള് സോഷ്യല് മീഡിയയില് താരങ്ങളാവുന്നത്.
മുണ്ടുടുത്ത് തനി നാടന് മലയാളി പയ്യനായി റെഡ് കാര്പ്പറ്റിലേയ്ക്ക് എത്തിയ നടന് ജോജു ജോര്ജാണ് ഇപ്പോള് ആരാധകരുടെ ഹൃദയം കവരുന്നത്. നിറഞ്ഞ കൈയ്യടികളോടെയാണ് വെനീസ് ജോജുവിനെയും സംഘത്തിനെയും സ്വീകരിച്ചത്.
ലോകത്തിലെ മൂന്ന് പ്രധാന ചലച്ചിത്ര മേളകളില് ഒന്നാണ് വെനീസ് ചലചിത്രമേള. ഇതില് പ്രദര്ശിപ്പിക്കാന് തിരഞ്ഞെടുക്കപ്പെട്ട ഒരേയൊരു ഇന്ത്യന് ചിത്രമെന്ന അംഗീകാരവും ചോലയ്ക്കുണ്ട്.
ചോല സിനിമയുടെ ആദ്യ ഷോയാണ് വെനീസില് നടക്കുന്നത് ജോജുവിനൊപ്പം ചിത്രത്തിന്റെ പ്രദര്ശനം കാണാന് സനല് കുമാര് ശശിധരന്, നിമിഷ സജയന്, സിജോ വടക്കന് , അഖില് വിശ്വനാഥ് എന്നിവരാണ് എത്തിയത്.
കഴിഞ്ഞ വര്ഷം മൂന്ന് കേരള സംസ്ഥാന ചലചിത്ര പുരസ്ക്കാരങ്ങള് ചോലയ്ക്ക് ലഭിച്ചിരുന്നു. മികച്ച നടിക്കുള്ള സംസ്ഥാന ചലചിത്ര പുരസ്ക്കാരം നിമിഷയ്ക്ക് ലഭിച്ചത് ഈ സിനിമയിലെ അഭിനയത്തിനാണ്. മികച്ച സ്വഭാവ നടനുള്ള പുരസ്ക്കാരം ജോജു ജോര്ജ്ജിനും മികച്ചസംവിധായകനുള്ള ജൂറിയുടെ പ്രത്യേക പരാമര്ശം സനല് കുമാറിനും ലഭിച്ചിരുന്നു.
