തിരുവനന്തപുരം: മലയാളികളുടെ ഹൃദയം കവര്ന്ന കുഞ്ഞു ഗായിക അനന്യ സിനിമയില് പാടുന്നു. പ്രജേഷ്സെന് സംവിധാനം ചെയ്യുന്ന ‘ വെള്ളം ‘എന്ന ചിത്രത്തിലാണ് കുഞ്ഞനന്യ പാടുന്നത്. ബിജിപാലാണ് സിനിമയ്ക്കായി സംഗീതം ഒരുക്കുന്നത്. ജന്മനാ കാഴ്ചയില്ലാത്ത അനന്യയുടെ പാട്ട് സാമൂഹ്യമാദ്ധ്യമങ്ങള് ഏറ്റെടുത്തു കഴിഞ്ഞു.
സ്കൂളില് നിന്ന് അനന്യ പാടിയ ‘നീ മുകിലോ’ എന്ന് ഗാനമാണ് വൈറലായത്. കണ്ണൂര് സ്വദേശി അനന്യ ധര്മ്മഷശാല മാതൃക അന്ധ വിദ്യാലയത്തിലെ നാലാം ക്ലാസ് വിദ്യാര്ത്ഥിനിയാണ്. നടി അനുമോളാണ് സാമൂഹ്യമാദ്ധ്യമങ്ങള് ഏറ്റെടുത്ത അനന്യയുടെ വീഡിയോ തനിക്ക് അയച്ചുതന്നതെന്ന് ബിജിപാല് പറഞ്ഞു.
അണിയറയില് ഒരുങ്ങുന്ന സിനിമയില് കുട്ടികളുടെ ഒരു പാട്ട് ഉണ്ടെന്നും അതാണ് അനന്യ പാടുകയെന്നും അദ്ദേഹം പറഞ്ഞു. ജയസൂര്യയാണ് സിനിമയിലെ നായകന്. ക്യാപ്റ്റന് എന്ന സിനിമയ്ക്ക് ശേഷം പ്രജേഷ്സെന്നും ജയസൂര്യയും ഒന്നിക്കുന്ന ചിത്രം കൂടിയാണ് ‘വെള്ളം’.