അബുദാബി കേരള സോഷ്യൽ സെന്റർ, മണിരംഗ് അബുദാബി , ശക്തി തിയറ്റേഴ്സ് അബുദാബി എന്നിവ സംയുക്തമായ് സംഘടിപ്പിക്കുന്ന എട്ടാമത് അബുദാബി കഥകളി മഹോത്സവം ഒക്ടോബർ 3 , 4 , 5 , എന്നീ തീയ്യതികളിൽ അബുദാബി കേരള സോഷ്യൽ സെന്ററിൽ അരങ്ങേറും. ” സീതായനം ” എന്ന പേരിൽ നടക്കുന്ന കഥകളി മഹോത്സവത്തിൽ രാമായണം കഥകളായ ബാലിവധം, രാവണ വിജയം , ശ്രീരാമ പട്ടാഭിഷേകം, തോരണ യുദ്ധം എന്നീ നാല് കഥകളാണ് അവതരിപ്പിക്കുന്നത്.
എല്ലാ ദിവസവും രാത്രി 7 മണിക്ക് കഥകളി മഹോത്സവം ആരംഭിക്കും . കലാമണ്ഡലം ഗോപിയാശാന്റെ നേതൃത്വത്തിലുള്ള അമ്പലപ്പുഴ സന്ദർശൻ കഥകളി വിദ്യാലയത്തിന്റെതാണ് കളിയോഗം . ആദ്യമായിട്ടാണ് ശ്രീരാമ പട്ടാഭിഷേകം കഥകളി ഇന്ത്യക്ക് പുറത്ത് അവതരിപ്പിക്കുന്നത് എന്ന പ്രത്യേകതയും ഈ കഥകളി മഹോത്സവത്തിനുണ്ട്. ശ്രീരാമ പട്ടാഭിഷേകം അതിന്റെ എല്ലാ ആഘോഷപ്പെരുമകളോടും കൂടിയാണ് അരങ്ങിൽ അവതരിപ്പിക്കുക ഇരുപതിലധികം നടന ഗായക വാദകന്മാർ ഈ കഥകളി മഹോത്സവത്തിൽ പങ്കെടുക്കുന്നുണ്ട് . പത്മശ്രീ കലാമണ്ഡലം ഗോപി , സദനം കൃഷ്ണൻ കുട്ടി, കലാമണ്ഡലം ബാലസുബ്രഹ്മണ്യൻ , കലാമണ്ഡലം ചമ്പക്കര വിജയൻ ,കലാമണ്ഡലം നീരജ് തുടങ്ങിയവർ പ്രധാന വേഷങ്ങൾ കൈകാര്യം ചെയ്യും.
കലാമണ്ഡലം ഗോപി ശ്രീരാമനായും ,സദനം കൃഷ്ണൻകുട്ടി ബാലിയും ഭരതനുമായും അരങ്ങിലെത്തും. നെടുമ്പിള്ളി രാംമോഹൻ വെങ്ങേരി നാരായണൻ അഭിജിത് വർമ്മ (പാട്ട് ), കലാമണ്ഡലം കൃഷ്ണദാസ് , ഉദയൻ നമ്പൂതിരി(ചെണ്ട) , കലാനിലയം മനോജ് ( മദ്ദളം) തുടങ്ങിയവരാണ് സംഗീത മേളങ്ങൾക്ക് പ്രാധാന്യമുള്ള ഈ കഥകൾക്ക് മാറ്റേകുന്നത് .കഥകളി ആസ്വാദനത്തിന്റെ സമസ്ത ആശയ തലങ്ങളെയും ഹൃദയസ്പര്ശകമാക്കുന്ന സീതായനം ആസ്വാദ്യമാക്കാന് ഡോ. പി. വേണുഗോപാലന് അരങ്ങ്
പരിചയപ്പെടുത്തും. കഥകളിയിലെ മുഖ്യസ്ഥാനീയരായ നിരവധി കലാകാരന്മാരുടെ സംഗമവേദിയായ മാറുന്ന ” സീതായനം” കഥകളി ആസ്വാദകർക്ക് മതിവരാത്ത ദൃശ്യാനുഭവമാണ് സമ്മാനിക്കുക
