ന്യൂഡല്ഹി: പൗരത്വ ഭേദഗതി നിയമത്തില് നടക്കുന്ന പ്രതിഷേധങ്ങളില് സുപ്രീം കോടതി അതൃപ്തി രേഖപ്പെടുത്തി. അക്രമവും പൊതു മുതലും നശിപ്പിക്കുന്നത് ഒരിക്കലും അംഗീകരിക്കാനാവില്ലെന്ന് ചീഫ് ജസ്റ്റിസ് എസ് എ ബോബ്ഡെ പറഞ്ഞു. ജാമിയ കേസുമായി ബന്ധപ്പെട്ട കേസ് നാളെ പരിഗണിക്കുമെന്ന് സുപ്രീം കോടതി അറിയിച്ചു.
വിദ്യാര്ത്ഥികളാണെന്നു കരുതി നിയമം കൈയ്യിലെടുക്കാന് ആര്ക്കും അധികാരമില്ല. ആദ്യം കലാപം അവസാനിക്കട്ടെ എന്നിട്ടാകാം നടപടിയെന്നും ചീഫ് ജസ്റ്റിസ് പറഞ്ഞു. തെരുവില് നിയമം കൈയ്യിലെടുക്കുകയാണെങ്കില് ഇടപെടില്ലെന്നും ചീഫ് ജസ്റ്റിസ് സൂചിപ്പിച്ചു. മുന് ജഡ്ജിമാരുടെ സംഘത്തെ അലിഗഡിലേക്ക് അയക്കുമെന്നും ചീഫ് ജസ്റ്റിസ് കൂട്ടിച്ചേര്ത്തു.
ജാമിയ മിലിയ, അലിഗഡ് സര്വ്വകലാശാലകളിലെ വിഷയം സുപ്രീം കോടതി മുതിര്ന്ന അഭിഭാഷക ഇന്ദിരാ ജയ്സിംഗ്, കോളിന് ഗൊണ്സാല്വ്സ്, സല്മാന് ഖുര്ഷിദ് എന്നിവര് ചീഫ് ജസ്റ്റിസിനു മുന്നില് സൂചിപ്പിച്ചപ്പോഴാണ് ബോബ്ഡെ നിലപാട് വ്യക്തമാക്കിയത്. വിഷയത്തില് കോടതിക്ക് അധികം ഇടപെടല് നടത്താന് സാധിക്കില്ല. ക്രമസമാധാന പ്രശ്നമാണെന്ന് നിരീക്ഷിച്ച കോടതി സമാധാനപരമായ പ്രതിഷേധങ്ങള്ക്ക് കോടതി എതിരല്ലെന്നും സൂചിപ്പിച്ചു.