ന്യൂഡല്ഹി: ലോകത്തിലെ ആദ്യത്തെ ഇലക്ട്രിക് റാലി കാര് അവതരിപ്പിക്കാനൊരുങ്ങി ഒപെൽ. അടുത്ത വര്ഷം ജൂലൈയില് പരീക്ഷണ വാഹനങ്ങള് പുറത്തിറക്കാനാണ് കമ്പനി ലക്ഷ്യമിടുന്നത്. നിലവില് വാഹനത്തിന്റെ ഡ്യൂറബിലിറ്റി ടെസ്റ്റ് പുരോഗമിക്കുകയാണ്.
അടിഭാഗത്തായി ക്രമീകരിച്ചിരിക്കുന്ന ബാറ്ററിയും വാഹനത്തിന്റെ ഭാരവും മികച്ച പെര്ഫോര്മന്സ് നല്കും. 2020/21 സീസണിനു വേണ്ടി 20ഓളം വാഹനങ്ങള് നിര്മ്മിക്കുമെന്നും 2020 ജൂലൈയില് ഉപഭോക്താക്കള്ക്ക് പരീക്ഷണ ഓട്ടം നടത്താനായി 15 വാഹനങ്ങള് പുറത്തിറക്കുമെന്നും കമ്പനി അറിയിച്ചു.
നിലവില് കാര്യങ്ങള് സുഗമമായി മുന്നോട്ട് പോകുന്നുണ്ട്. റാലിയുടെ സമയത്തുള്ള ബാറ്ററിയുടെ താപനില ക്രമീകരിക്കുന്നതും മറ്റ് സോഫ്റ്റ്വെയര് സംബന്ധമായ കാര്യങ്ങളിലുമാണ് ഇപ്പോള് പരീക്ഷണം നടക്കുന്നതെന്ന് ഒപെല് മോട്ടോര്സ്പോര്ട്ട് ഡയറക്ടര് ജോര്ഗ് ഷ്രോട്ട്. അറിയിച്ചു.
കോംപെറ്റീഷന് മോഡ്, റെയിന് മോഡ്, എനര്ജി-സേവിംഗ് ഇക്കോ മോഡ് എന്നിങ്ങനെയുള്ള മൂന്ന് മോഡുകളുള്ള ബാറ്ററിയാണ് വാഹനത്തില് ഉപയോഗിക്കുക. കോംപെറ്റീഷന് മോഡില് ഉയര്ന്ന പവറാണ് വാഹനം ഉത്പാദിപ്പിക്കുക. മഴക്കാലത്ത് തെന്നുന്ന പ്രതലത്തില് സഞ്ചരിക്കുന്നതിനുള്ള സജ്ജീകരണങ്ങളാണ് റെയിന് മോഡില് ഉണ്ടാകുക. സാധാരണ നിലയിലുള്ള ഡ്രൈവിംഗിന് അനുയോജ്യമായ മോഡാണ് എനര്ജി സേവിംഗ് മോഡ്.
