രണ്ട് പതിറ്റാണ്ടിന് ശേഷം ഇന്ത്യൻ വിപണിയിലേക്ക് മടങ്ങിയെത്തിയ വാഹന നിർമ്മാതാക്കളായ ജാവയുടെ ഏറ്റവും പുതിയ മോഡലിന്റെ ബുക്കിംഗ് ഇന്ന് ആരംഭിക്കും. ജാവയുടെ പെരാക് മോഡലിന്റെ ബുക്കിംഗ് ആണ് പുതുവർഷ ദിനമായ ഇന്ന് വൈകുന്നേരം ആരംഭിക്കുന്നത്. കമ്പനിയുടെ വെബ് സൈറ്റിലൂടെ ഓൺലൈനായും ജാവ ഷോറൂമുകളിലൂടെയും ബുക്ക് ചെയ്യാം.
ഇന്ന് ബുക്കിംഗ് ആരംഭിക്കുന്ന പെരാക് 2020 ഏപ്രില് രണ്ട് മുതല് ഉപഭോക്താക്കള്ക്ക് കൈമാറി തുടങ്ങും. ബോബര് ശൈലിയിലുള്ള പെരാക്കിന് 1.94 ലക്ഷം രൂപയാണ് എക്സ്ഷോറും വില. ഇക്കഴിഞ്ഞ നവംബറിലാണ് വാഹനം പുറത്തിറക്കിയത്.
ജാവ ബൈക്കുകളിലെ കരുത്തനാണ് പെരാക്. ഒറ്റനോട്ടത്തില് ജാവയുടെ പരിഷ്കൃത രൂപമാണെന്ന് തോന്നിപ്പിക്കുന്ന തരത്തിലുള്ള ഡിസൈനാണ് പെരാകിന് നല്കിയിരിക്കുന്നത്. 334 സിസി ലിക്വിഡ് കൂള് എഞ്ചിനാണ് വാഹനത്തിന് കരത്തേകുക. മുന്നില് 18 ഇഞ്ചും പിന്നില് 17 ഇഞ്ചും വീതിയുള്ള ടയറുകളാണുള്ളത്. ഡ്യുവല് ഡിസ്ക് ബ്രേക്ക്, ഡ്യുവല് ചാനല് എബിഎസ് തുടങ്ങിയ സുരക്ഷാ സംവിധാനങ്ങള് വാഹനത്തിലുണ്ട്.
ബിഎസ് 6 നിലവാരത്തില് അവതരിപ്പിക്കുന്ന 334 സിസി എഞ്ചിന് 30 ബിഎച്ച്പി പവറും 31 എന്എം ടോര്ക്കും ഉത്പ്പാദിപ്പിക്കും. ആറ് സ്പീഡ് ട്രാന്സ്മിഷനില് പുറത്തിറങ്ങുന്ന പെരാക് സിംഗിള് സീറ്റ് വാഹനമാണ്. മാറ്റ് പെയ്ന്റ് ഫിനിഷും ചെറിയ എക്സ്ഹോസ്റ്റും പെരാക്കിനെ കാഴ്ചയില് വ്യത്യസ്തമാക്കുന്നു. മുന്നില് ടെലിസ്കോപ്പിക് സസ്പെന്ഷനും പിന്നില് മോണോഷോക്കുമാണ് ജാവ അവതരിപ്പിച്ചിരിക്കുന്നത്.