ഇന്ത്യൻ നിരത്തുകളിൽ എതിരാളികളില്ലാതെ മുന്നേറിക്കൊണ്ടിരുന്ന ടൊയോട്ട ഇന്നോവയ്ക്ക് വെല്ലുവിളിയുമായി കിയ കാർണിവൽ എത്തുന്നു. കൊറിയൻ വാഹന നിർമ്മാതാക്കളായ കിയയുടെ ഇന്ത്യയിലെ രണ്ടാം മോഡലായ കാർണിവൽ ഈ ഫേബ്രുവരിയിൽ പുറത്തിറക്കുമെന്നാണ് ഇപ്പോൾ പുറത്തുവരുന്ന റിപ്പോർട്ടുകൾ. ഡൽഹി ഓട്ടോ എക്സ്പോയിലാകും വാഹനം പുറത്തിറക്കുക.
ഇന്നോവ ക്രിസ്റ്റയാണ് പ്രധാന എതിരാളിയെങ്കിലും വലിപ്പത്തിലും ഫീച്ചറുകളിലും ക്രിസ്റ്റയെക്കാള് ഒരുപടി മുന്നിലാണ് കാർണിവൽ. 5115 mm നീളവും 1985 mm വീതിയും 1740 mm ഉയരവും 3060 mm വീല്ബേസുമാണ് കാര്ണിവലിനുള്ളത്. ബിഎസ് VI നിലവാരത്തിലുള്ള 2.2 ലിറ്റര് ടര്ബോ ചാര്ജ്ഡ് ഡീസല് എന്ജിനായിരിക്കും വാഹനത്തിനുള്ളത്.
രണ്ടാം നിരയിൽ വശങ്ങളിലേക്ക് തുറക്കുന്ന സ്ലൈഡിംഗ് ഡോറുകളാണ് ഘടിപ്പിച്ചിരിക്കുന്നത്. ഇത് വാഹനത്തിന് കൂടുതൽ ആഡംബരം നൽകുന്നുണ്ട്. എട്ട് എയര്ബാഗുകള്, എബിഎസ്, ഇഎസ്സി, ഹില്സ്റ്റാര്ട്ട് അസിസ്റ്റ് കണ്ട്രോള്, റിവേഴ്സ് പാര്ക്കിങ് സെന്സറുകള്, ഫ്രണ്ട് പാര്ക്കിങ് സെന്സറുകള്, പ്രൊജക്ഷന് ഹെഡ്ലാമ്പ്, ഡിആര്എല്, ഫോഗ് ലാമ്പ്, 19 ഇഞ്ച് ഡയ്മണ്ട് കട്ട് അലോയി വീല്, എല്ഇഡി ടെയില് ലാമ്പ്, സ്കിഡ് പ്ലേറ്റ് എന്നിവയും കാർണിവലിന്റെ സവിശേഷതകളാണ്.
വാഹനത്തിന്റെ ബുക്കിംഗ് സംബന്ധിച്ച് സൂചനകള് ഒന്നും തന്നെ കമ്പനി ഇതുവരെ പുറത്തുവിട്ടിട്ടില്ല. ഒപ്പം വാഹനത്തിന്റെ വിലയെ സംബന്ധിച്ചുള്ള സൂചനകളും കിയ നല്കിയിട്ടില്ല. 20 ലക്ഷത്തിന്റെ മുകളിൽ വില പ്രതീക്ഷിക്കുന്നുണ്ടെങ്കിലും ഇന്നോവയ്ക്കൊപ്പം പിടിച്ച് നിൽക്കുന്നതിനായി വില അധികം ഉയരാനിടയില്ലെന്നാണ് റിപ്പോർട്ടുകൾ.