മുംബൈ: ശ്രീലങ്കക്കെതിരായ ടി20 പരമ്പരയിലെ മൂന്നാമത്തേതും അവസാനത്തേതുമായി ടി20 ഇന്നു നടക്കും. മഹാരാഷ്ട്രയിലെ ഗഹൂഞ്ചേയിലാണ് കളിനടക്കുന്നത്. മഴമൂലം ടോസ്സ് പോലും ചെയ്യാതെ ഉപേക്ഷിച്ച ആദ്യ മത്സരത്തിന് ശേഷം രണ്ടാം മത്സരത്തില് ശ്രീലങ്കയെ ഏഴു വിക്കറ്റിന് തകര്ത്താണ് ഇന്ത്യ ഉശിരന് ജയം നേടിയത്. ടീമില് കാര്യമായ മാറ്റം വരാനുള്ള സാധ്യത കുറവാണെന്നാണ് നിഗമനം. നിലവില് ടീം ഇന്ത്യ 1-0ന് മുന്നിലാണ്.
മികച്ച ഫോമിലുള്ള ഓപ്പണര്മാരായ ശിഖര് ധവാന്റെയും രാഹുലിന്റെയും മികവിലാണ് ഇന്ത്യ കഴിഞ്ഞ കളി അനായാസം ജയിച്ചത്. ഒപ്പം മധ്യനിരയില് ശ്രേയസ്സ് അയ്യരുടെ വെടിക്കെട്ട് ബാറ്റിംഗ് കോഹ്ലിയെപോലും അമ്പരപ്പിച്ച രസകരമായ കാഴ്ചയും ആരാധകരെ ആവേശത്തിലാക്കിയിരുന്നു.
ബൗളിംഗില് അടുത്തിടെയായി ആരെ പരീക്ഷിച്ചാലും വിജയിക്കുന്നു എന്ന ഭാഗ്യവും ഇന്ത്യക്കുണ്ട്. ശാര്ദ്ദൂല് ഠാക്കൂര് കഴിഞ്ഞ കളിയില് 3 വിക്കറ്റുകള് വീഴ്ത്തിയപ്പോള് നവദീപ് സൈനിയും കുല്ദീപ് യാദവും രണ്ടു വിക്കറ്റ് വീതം വീഴ്ത്തി മികച്ച പ്രകടനം നടത്തി.
ഇന്നത്തെ ടീം ലൈനപ്പിവല് മാറ്റം വരുത്തിയാല് സഞ്ചുവിന് അവസരം കിട്ടുമോ എന്ന സാധ്യതയാണ് ആരാധകരുടേയും മനസ്സിലുള്ളത്. ശ്രീലങ്കയെ സംബന്ധിച്ചിടത്തോളം മലിംഗയുടെ ബൗളിംഗിനോ മടങ്ങി എത്തിയ മാത്യൂസിന്റെ ഓള് റൗണ്ടര് മികവിനോ അവസരത്തിനൊത്ത് ഉയരാനായിട്ടില്ല.
