ആയിരം ദിവസം കൊണ്ട് ആയിരം ഗാനങ്ങള് ആലപിച്ച ദുബായിലെ ഇന്ത്യന് ഗായികയ്ക്ക് ഗോള്ഡന് ബുക്ക് ഓഫ് വേള്ഡ് റെക്കോര്ഡ്. നാല്പത്തെട്ടുകാരി സ്വപ്ന എബ്രഹാമിനാണ് ലോക റെക്കോര്ഡ് ലഭിച്ചത്. ഗാനങ്ങള് എഴുതിയതും കംപോസ് ചെയ്തതും പാടിയതും സ്വപ്ന തന്നെയാണ്. 2017-ഏപ്രില് 8 മുതല് 2020 ജനുവരി 2 വരെയുള്ള ആയിരം ദിവസങ്ങളിലാണ് പരിപാടി സംഘടിപ്പിച്ചത്. ഇത്രയും ദിവസത്തിനിടെ തല്സമയം പാട്ട് രചിക്കുകയും കംപോസ് ചെയ്യുകയും ഗാനം പാടി റെക്കോര്ഡ് ചെയ്യുകയുമായിരുന്നു സ്വപ്ന.
ഗോള്ഡന് ബുക്ക് ഓഫ് വേള്ഡ് റെക്കോര്ഡിന് പിന്നാലെ ഗിന്നസ് റെക്കോര്ഡിനും അപേക്ഷിച്ചിരിക്കുകയാണ് സ്വപ്ന. ഇത്രയും വര്ഷത്തിനിടെ 22 ആല്ബങ്ങളാണ് സ്വപ്ന ചെയ്തത്. പലപ്പോഴും സംഗീതം അവസാനിപ്പിക്കാന് ആഗ്രഹിച്ചിരുന്നു. എന്നാല് അതിന് സാധിക്കില്ലെന്ന് തോന്നിയപ്പോഴാണ് ഗോള്ഡന് ബുക്ക് ഓഫ് വേള്ഡ് റെക്കോര്ഡിനായി ശ്രമിച്ചതെന്ന് സ്വപ്ന മാധ്യമങ്ങളോട് സൂചിപ്പിച്ചു.
ദുബായില് സ്ഥിരതാമസമാക്കിയ കോട്ടയം സ്വദേശിയാണ് സ്വപ്ന എബ്രഹാം. ദുബായിലെ മാനേജേമെന്റ് കണ്സള്ട്ടിങ്ങ് കമ്പനിയില് ജോലി ചെയ്യുകയാണ് സ്വപ്ന .അമേരിക്ക, ബ്രിട്ടന്, കാനഡ, ജര്മനി, കെനിയ, ഇസ്രയേല്, ഈജിപത്, ശ്രീലങ്ക, സിംഗപ്പുര്, മലേഷ്യ, ഹോങ്കോംഗ്, ഫിലിപ്പീന്സ്, ഓസ്ട്രേലിയ, ന്യൂസിലന്ഡ് തുടങ്ങിയ രാജ്യങ്ങളിലും ഇന്ത്യയുടെ പല ഭാഗങ്ങളിലായി സ്റ്റേജ് ഷോകള് നടത്തിയ ശേഷമാണ് സ്വപ്ന ഈ നേട്ടത്തിനൊരുങ്ങിയത്.
പരമ്പരാഗത സുവിശേഷ ഗാനങ്ങള് മുതല് പോപ്പ്, റോക്ക്, ഫോക്ക് ഗാനങ്ങള് വരെ സ്വപ്നയ്ക്കു വഴങ്ങും. 1994 മണിപ്പാലിലെ പൈ മാനേജ്മെന്റ് ഇന്സ്റ്റിറ്റ്യൂട്ടില് നിന്ന് എംബിഎയും 2008 ല് ഇന്ത്യന് ഇസ്റ്റിറ്റിയൂട്ട് ഓഫ് മാനേജ്മെന്റില് നിന്ന് മാര്ക്കറ്റിംഗില് എക്സിക്യൂട്ടീവ് പ്രോഗ്രാമും കരസ്ഥമാക്കിയ സ്വപ്ന നിരവധി പുരസ്കാരങ്ങള്ക്കും കൂടി ഉടമയാണ്. ഇന്ത്യയില് നിന്നും അന്താരാഷ്ട്ര തലത്തില് ഇംഗ്ലീഷ് ഭാഷയില് ക്രിസ്ത്യന് ആല്ബങ്ങള് രചിച്ച് പ്രചാരമാക്കിയ ആദ്യത്തെ ഇന്ത്യന് മലയാളി വനിത എന്ന ബഹുമതിയും സ്വപ്നയുടെ പേരിലാണ്.
