ആരാധകര് ഏറെ കാത്തിരുന്ന ബജാജിന്റെ ഇലക്ട്രിക് സ്കൂട്ടര് ചേതക് ഇന്ത്യയില് അവതരിപ്പിച്ചു. എക്സ് ഷോറും വില ഒരു ലക്ഷം മുതല്. പുനെയിലാണ് ആദ്യ വില്പനയ്ക്ക് എത്തുക തുടര്ന്ന് വില്പന ബംഗ്ലൂരിലേക്ക് വ്യാപിപ്പിക്കും. ഇന്ത്യന് വിപണിയില് മാത്രമല്ല യൂറോപ്പിലേക്കും ചേതക് കയറ്റി അയക്കുമെന്നാണ് ബജാജ് കമ്പനി അധികൃതര് വ്യക്തമാക്കിയത്.
15 വര്ഷത്തെ ഇടവേളയ്ക്ക് ശേഷമാണ് ചേതക് എന്ന പേര് വീണ്ടും ആരാധകരുടെ മനസിലേക്ക് തിരിച്ചെത്തുന്നത്. മധ്യവര്ഗക്കാരന്റെ സ്വപ്നമായിരുന്നു ഒരു കാലത്ത് ചേതക്. ഹമാരാ ബജാജ് എന്ന മുദ്രവാക്യത്തോടെ രാജ്യം നെഞ്ചേറ്റിയ സാധാരണക്കാരന്റെ വാഹനമായിരുന്നു ചേതക്. 1972-ല് ബജാജ് അവതരിപ്പിച്ച ചേതക് 2006-ലാണ് നിര്മ്മാണം അവസാനിപ്പിച്ചത്. പേര് ഒന്നാണെങ്കിലും പഴയ ചേതകിനോട് സമാനതകളൊന്നും ഇ-ചേതകിനില്ല. റെട്രോ ഡിസൈനിന് പ്രാധാന്യം നല്കിയാണ് ഇ-ചേതകിന്റെ രൂപ കല്പന.
നിയോ-റെട്രോ രൂപഭംഗിയുള്ള പ്രീമിയം ഇലക്ട്രിക് സ്കൂട്ടറാണ് പുതിയ ബജാജ് ചേതക്. വൃത്താകൃതിയിലുള്ള ഹെഡ് ലാംപ്, വീതി കൂടിയ എപ്രോണ്, ആകാരവടിവുള്ള ബോഡി പാനലുകള് എന്നിവ പഴയകാല ചേതക്കില് നിന്ന് കടമെടുത്തപ്പോള് കറുപ്പ് നിറത്തിലുള്ള റിയര്വ്യൂ മിറര്, അലോയ് വീലുകള്, എല്ഇഡി ലൈറ്റിങ്, എല്ഇഡി റെയില് ലാംപ്, ഡേടൈം റണ്ണിങ് ലാമ്പുകള്, രണ്ടായി ഭാഗിച്ച റെയില് ലാംപ് ക്ലസ്റ്റര് എന്നിവ ചേതക്കിന് ആധുനിക മുഖഭാവം നല്കുന്നു.
കൂടാതെ ധാരാളം ക്രോം ഘടകങ്ങളും ചേര്ത്ത് പ്രീമിയം ലുക്ക് വര്ധിപ്പിച്ചിട്ടുണ്ട്. മെറ്റല് ബോഡിയുള്ള ബജാജ് ചേതക്, ഐവറിയും ഗോള്ഡും അടക്കം 6 നിറങ്ങളിലാണ് ചേതക് വിപണിയില് എത്തുന്നത്. ബജാജ് ചേതക് അര്ബന്റെ വില ഒരു ലക്ഷവും ബജാജ് ചേതക് പ്രീമിയത്തിന് 1.15 ലക്ഷം രൂപയുമാണ്. IP67 റേറ്റിങ്ങുള്ള ഹൈ-ടെക് ലിഥിയം അയേണ് ബാറ്ററിയാണ് ഇതിലുള്ളത്. സിറ്റി മോഡില് ഒറ്റ ചാര്ജില് 95-100 കിലോമീറ്ററും സ്പോര്ട്സ്മോഡില് 85 കിലോമീറ്ററും സഞ്ചരിക്കാന് സാധിക്കും. 4KW ഇലക്ട്രിക് മോട്ടോര് കരുത്തിലാണ് ചേതക്ക് കുതിക്കുക.