സിഡ്‌നി:ഇന്ത്യന്‍ വനിതകള്‍ക്ക് വനിതാ ടി20 ലോകകപ്പില്‍ ത്രസിപ്പിക്കുന്ന ജയം. മൂന്ന് റണ്‍സിനാണ് ഇന്ത്യന്‍ വനിതകള്‍ ന്യൂസിലാന്റിനെ മുട്ടുകുത്തിച്ചത്. ഇന്ത്യ വെച്ച 133 എന്ന അത്ര വലുതല്ലാത്ത വിജയ ലക്ഷ്യം ന്യൂസിലാന്റിന്് മറികടക്കാനായില്ല. കിവി വനിതകള്‍ക്ക് നിശ്ചിത 20 ഓവറുകളില്‍ 5 വിക്കറ്റ് നഷ്ടത്തില്‍ 130 റണ്‍സ് എടുക്കാനേ സാധിച്ചുള്ളു.
ഇന്ത്യന്‍ ബൗളിംഗ് നിര അവസാന ഓവറുകളില്‍ നടത്തിയ കൃത്യതയാര്‍ന്ന പ്രകടനമാണ് ന്യൂസിലാന്റിനെ സമ്മര്‍ദ്ദത്തിലാക്കിയത്. ജയിക്കാന്‍ അവസാന ഓവറില്‍ 16 റണ്‍സ് വേണമെന്നിരിക്കെ അവസാന പന്തില്‍ മികച്ച ബാറ്റിംഗ് നടത്തികൊണ്ടിരുന്ന ജെന്‌സന്‍ പുറത്തായതോടെ ഇന്ത്യ 3 വിക്കറ്റിന് ജയം നേടി. ന്യൂസിലാന്റിന്റെ മികച്ച ഫോമിലുള്ള ക്യാപ്റ്റന്‍ സോഫിയാ ഡിവൈനിനേയും (14) ഓപ്പണര്‍ റേച്ചല്‍ പ്രീസ്റ്റിനേയും(12) നിസ്സാര സ്‌കോറുകള്‍ക്ക് പുറത്താക്കാനായതാണ് ഇന്ത്യക്ക് ഗുണമായത്. കഴിഞ്ഞ കളിയില്‍ 75 റണ്‍സ് അതിവേഗം എടുത്ത താരമാണ് സോഫിയ.
ന്യൂസിലാന്റിനായി മധ്യനിരയില്‍ ഗ്രീന്‍(24),മാര്‍ട്ടിന്‍(25), അമേലിയ കെര്‍(34 നോട്ടൗട്ട്) എന്നിവരാണ് ബാറ്റിംഗില്‍ മികച്ചു നിന്നത്. ഇന്ത്യക്കായി പന്തെറിഞ്ഞ 5 പേരും ഒരോ വിക്കറ്റുകള്‍ വീതമെടുത്തു. ആദ്യം ബാറ്റുചെയ്ത ഇന്ത്യക്കായി ഷെഫാലി വെര്‍മയുടെ 46 റണ്‍സാണ് അടിത്തറയായത്. അവസാന ഓവറുകളില്‍ ശിഖാ പാണ്ഡെയും(10) പൂനംയാദവും(14) നടത്തിയ ബാറ്റിംഗാണ് സ്‌ക്കോര്‍ 133 ലെത്തിച്ചത്.
