ക്രൈസ്റ്റ്ചര്ച്ച് : ന്യൂസിലാന്റില് ഇന്ത്യന് ബാറ്റിംഗിന്റെ ശനിദശ തുടരുന്നു. ക്രൈസ്റ്റ്ചര്ച്ചില് ഇന്ന് ആരംഭിച്ച രണ്ടാം ടെസ്ററിലും ഇന്ത്യ തകര്ന്നടിഞ്ഞു.242 റണ്സിനാണ് കിവീസ് നിര ഇന്ത്യന് ബാറ്റിംഗിനെ വീണ്ടും തകര്ത്തത്. ഒന്നാം ദിവസം കളി അവസാനിക്കുമ്പോള് ന്യൂസിലാന്റ് വിക്കറ്റുകള് നഷ്ടപ്പെടുത്താതെ 63 റണ്സെടുത്തിട്ടുണ്ട്. ടോം ബ്ലന്ഡല്(29), ടോം ലതാം(27) എന്നിവരാണ് ക്രീസ്സില്.
ബാറ്റിംഗിനിറങ്ങിയ ഇന്ത്യക്കായി പൃഥ്വീഷാ(54), ചേതേശ്വര് പൂജാര(54) ഹനുമാ വിഹാരി(55) എന്നിവരാണ് ഭേദപ്പെട്ട പ്രകടനം നടത്തിയത്. തുടര്ച്ചയായി 21-ാം കളിയിലും ബാറ്റിംഗില് അമ്പേ പരാജയപ്പെട്ട നായകന് വിരാട് കോഹ്ലി വെറും 3 റണ്സിന് പുറത്തായി. മായങ്ക് അഗര്വാള്(7), അജിന്ക്യാ രഹാനെ(7), ഋഷഭ് പന്ത്(12), രവീന്ദ്ര ജഡേജ(9) എന്നിവരെ തുച്ഛമായ സ്ക്കോറിന് കൃത്യമായ ഇടവേളകളില് കിവീസ് ബൗളര്മാര് കൂടാരം കയറ്റി.
ആദ്യ ടെസ്റ്റിലെ ബൗളിംഗ് താരമായ ജാമിസണാണ് ഇത്തവണയും ഇന്ത്യന് നിരയെ തകര് ത്തത്. വെറും 14 ഓവറില് പുതുമുഖതാരം 45 റണ്സുമാത്രം വിട്ടുനല്കി 5 വിക്കറ്റുകള് കൊയ്തു.ജാമിസണിന്റെ അന്താരാഷ്ട്ര കരിയറിലെ ആദ്യ 5 വിക്കറ്റ് നേട്ടവുമാണിത്. ആദ്യ ടെസ്റ്റിലെ ആദ്യ ഇന്നിംഗ്സില് ജാമിസണ് 4 വിക്കറ്റുകള് നേടിയിരുന്നു. കിവീസ് നിരയില് സീനിയര്താരം ടിം സൗത്തി കോഹ്ലിയേയും രഹാനയേയും വീഴ്ത്തി ഇന്ത്യയുടെ മധ്യനിരയെ തകര്ക്കുന്നതില് നിര്ണ്ണായക പങ്കാണ് വഹിച്ചത്.
