സിഡ്നി: ടി20 വനിതാ ലോകകപ്പില് ഓസ്ട്രേലിയ ഫൈനലില് കടന്നു. ദക്ഷിണാഫ്രിക്കയെ 5 റണ്സിന് തോല്പ്പിച്ചാണ് നിലവിലെ ചാമ്പ്യന്മാരായ ഓസ്ട്രേലിയ ഫൈനലില് കടന്നിരിക്കുന്നത്. മഴ ഇടക്കിടെ വന്നു പോയ മത്സരത്തില് ആദ്യം ബാറ്റ്ചെയ്ത കങ്കാരു വനിതകള് 5ന് 134 റണ്സാണെടുത്ത്. മറുപടി ബാറ്റിംഗില് മഴനിയമമനുസരിച്ച് 13 ഓവറാക്കി ചുരുക്കിയ മത്സരത്തില് ദക്ഷിണാഫ്രിക്ക 5 വിക്കറ്റിന് 92 റണ്സില് ഒതുങ്ങി.
ഓസീസിനായി ക്യാപ്റ്റന് ലാനിംഗ് 49 റണ്സ് നേടി പുറത്താകാതെ നിന്നപ്പോള് ഒപ്പണര് മൂണി 28റണ്സും ഹീലി 18, ഹെയ്ന്സ് 17 എന്നിവരാണ് ബാറ്റിംഗില് മികവ് കാട്ടിയത്. ദക്ഷിണാഫ്രിക്കക്കായി അയബോംഗാ ഖാക്ക 3 വിക്കറ്റുകള് വീഴ്ത്തി. മറുപടി ബാറ്റിംഗില് ദക്ഷിണാഫ്രിക്കയുടെ തുടക്കം ഭേദപ്പെട്ട നിലയിലായിരുന്നു.ബാറ്റിംഗില് ലുസ്സ് 21, വോള്വാര്ട്ടു 41, എന്നിവര് ശ്രമിച്ചെങ്കിലും ജയിക്കാനാവശ്യമായ റണ്സിലേക്ക് എത്താനായില്ല. ഓസീസ് ബൗളിംഗില് ഷൂട്ട് 2 വിക്കറ്റുകള് വീഴ്ത്തി. മറ്റ് ബൗളര്മാര് ഓരോ വിക്കറ്റ് വീതം വീഴ്ത്തി.
ഞായറാഴ്ച നടക്കുന്ന ഫൈനലില് ഇന്ത്യയാണ് ഓസ്ട്രേലിയയുടെ എതിരാളികള്. നാലുതവണ കിരീടം ചൂടിയ ഓസ്ട്രേലിയയെ ഇത്തവണ ഉദ്ഘാടന മത്സരത്തില് തകര്ത്ത ആത്മവിശ്വാസത്തിലാണ് ഇന്ത്യ ഫൈനലില് ഇറങ്ങുന്നത്.
