മുംബൈ: ക്രിക്കറ്റിന്റെ എല്ലാ ഹരവും കാണികളിലെത്തിച്ച ഇതിഹാസങ്ങള് ഒന്നിക്കുന്നു. റോഡ് സേഫ്റ്റി വേള്ഡ് സീരീസ് 2020ക്കായാണ് ക്രിക്കറ്റിലെ മാസ്മരിക താരങ്ങള് കാണികള്ക്ക് മുന്നില് വിരുന്നൊരുക്കുന്നത്. സച്ചിനും,യുവരാജും, ലാറയും, തിലകരത്ന ദില്ഷനും അടങ്ങുന്ന ബാറ്റിംഗ് കരുത്തന്മാര്ക്കൊപ്പം ബ്രെറ്റ് ലീയും മുത്തയ്യ മുരളീധരനും അടങ്ങുന്ന ബൗളിംഗ് പ്രതിഭകളും പരസ്പരം ഏറ്റുമുട്ടും. ഫീല്ഡിംഗിലെ എക്കാലത്തേയും അത്ഭുതമായ ജോണ്ടീ റോഡ്സും കളം നിറയും. റോഡ് സുരക്ഷയെ മുന്നിര്ത്തിയുള്ള പ്രത്യേക ബോധവല്ക്കരണ പരിപാടി എക്കാലത്തേയും വലിയ ഹിറ്റാക്കാനാണ് മഹാരാഷ്ട്രാ സര്ക്കാറിന്റെ ശ്രമം.
നാളെ ആരംഭിക്കുന്ന സീരീസ് 22-ാം തീയതി വരെ നടക്കും. ആദ്യ മത്സരം ഇന്ത്യയും-വിന്ഡീസും തമ്മിലാണ്. ആകെ അഞ്ചു ടീമുകളാണ് കളിക്കുന്നത്. ഇന്ത്യാ ലജന്ഡ്സ്, ഓസ്ട്രേലിയ ലജന്ഡസ്, ശ്രീലങ്ക ലജന്ഡ്സ്, ദക്ഷിണാഫ്രിക്ക ലജന്ഡ്സ്, വെസ്റ്റിന്ഡീസ് ലജന്ഡ്സ് എന്നിവയാണ് ടീമുകള്. മുംബൈയുടെ വിവിധ മേഖലകളിലും പൂനെയിലുമായാണ് ക്രിക്കറ്റ് മത്സരങ്ങളിലൂടെ റോഡ് സുരക്ഷാ ബോധവല്ക്കരണ പരിപാടി നടക്കുന്നത്. ഫൈനല് നടക്കുന്നത് മുംബൈയിലെ ബ്രാബോണ് സ്റ്റേഡിയത്തിലാണ്. നാളെ ഇന്ത്യയും വിന്ഡീസും വാങ്കടെ സ്റ്റേഡിയത്തില് കളിക്കാനിറങ്ങും. എല്ലാ കളികളും രാത്രി 7 മണിക്കാണ് ആരംഭിക്കുക.റൗണ്ട് റോബിന് ശൈലിയിലാണ് കളികള്.
