ചെന്നൈ: ഇന്ത്യന് കരസേനക്ക് അഭിമാനമായി യുവസൈനിക ഓഫീസര്മാര്. കരസേനയുടെ ഓഫീസര് പരിശീലനം പൂര്ത്തിയാക്കി ഇറങ്ങിയിരിക്കുന്നത് 31 വനിതകളടക്കം 167 പേര്. ചെന്നൈയിലെ കരസേനാ പരിശീലനകേന്ദ്രത്തിലെ കഠിനപരിശീലനങ്ങള്ക്കൊടുവിലാണ് രാജ്യത്തെ വിവിധ മേഖലകളിലേക്ക് നിയോഗിക്കപ്പെടാന് തയ്യാറായി വനിതകളടക്കമുള്ള കരുത്തുറ്റ യുവനിര പുറത്തിറങ്ങിയിരിക്കുന്നത്. ഇവര്ക്കൊപ്പം വിദേശരാജ്യങ്ങളില് നിന്നു ള്ള 11 പേരും ഇന്ത്യന് സേനയുടെ കീഴില് പരിശീലനം സിദ്ധിച്ചു പുറത്തിറങ്ങി.
ഒരുമിച്ച് നിന്ന് ദേശീയപതാകയും കരസേനയുടെ പതാകയും ഉയര്ത്തി പ്രതിജ്ഞ ചെയ്ത സൈനികര് തുടര്ന്ന് ‘ പ്രസിദ്ധമായ കരസേനാ ഗാനം ‘കദം കദം ബഢായേ ജാ’ പാടിയാണ് മെഡലുകളണിഞ്ഞ് ഔദ്യോഗിക ബിരുദദാനച്ചടങ്ങ് ആരംഭിച്ചത്. സേനയുടെ വാദ്യവിഭാഗത്തിന്റെ മാര്ച്ചിന് ശേഷം സൈനികര് മുതിര്ന്ന സൈനിക ഉദ്യോഗസ്ഥരെ അഭിവാദ്യം ചെയ്തു. പരിശീലന മികവ് തെളിയിച്ചവര്ക്ക് പ്രത്യേക മെഡലുകളും പ്രശസ്തി പത്രവും കൈമാറി.
മാതാപിതാക്കളും ബന്ധുജനങ്ങളുമടക്കം, യുവസൈനികരുടെ ജീവിതത്തിലെ സുപ്രധാന നിമിഷത്തിന് സാക്ഷിയാകാനെത്തിയിരുന്നു. ഔദ്യോഗിക പരിപാടികള് കഴിഞ്ഞയുടനെ പരിശീലനക്യാമ്പുകളിലെ പതിവ് രസകരങ്ങളായ തൊപ്പിയേറും ഒരുമിച്ച് എടുത്തുയര് ത്തലുകള്ക്കിടയില് ഉയര്ന്നുകേട്ടത് വീര് ശിവാജി ജയ്ഭവാനി വിളികളായിരുന്നു. ചടങ്ങുകളെ തുടര്ന്ന് ധീരയുവസൈനികര് മാതാപിതാക്കളുടെ ആശിര്വ്വാദത്തോടെ സേനാ ദൗത്യം ഏറ്റെടുത്തു.
