മെല്‍ബണ്‍: വനിതാ ടി20 ലോകകപ്പ് കിരീടം ഓസ്‌ട്രേലിയ നിലനിര്‍ത്തി. കലാശപോരാട്ട ത്തില്‍ ഇന്ത്യയെ 99 റണ്‍സിന് പുറത്താക്കിയാണ് ആതിഥേയര്‍ 85 റണ്‍സിന്റെ ആധികാരിക ജയം ആഘോഷിച്ചത്. വിജയ ലക്ഷ്യമായ 185നെതിരെ ടീം ഇന്ത്യ തിങ്ങിനിറഞ്ഞ കാണികള്‍ക്ക് മുന്നില്‍ തകര്‍ന്നടിഞ്ഞു. മുന്‍നിര ബാറ്റിംഗ് താരങ്ങളാരും തിളങ്ങാതിരുന്ന മത്സരത്തില്‍ മധ്യനിരയില്‍ ദീപ്തിശര്‍മ്മയുടെ 33 റണ്‍സുമാത്രമാണ് വേറിട്ടു നിന്നത്. ഓസ്‌ട്രേലിയക്കായി ഷൂട്‌സ് വെറും 18 റണ്‍സിന് 4 വിക്കറ്റും ജൊനാസെന്‍ 20ന് 3 വിക്കറ്റുകളും വീഴ്‌ത്തി. ഇതോടെ ലോകകപ്പ് ചരിത്രത്തില്‍ ഓസീസിന്റെ അഞ്ചാം കിരീടമാണിത്.
ലോകകപ്പില്‍ ഇതുവരെ നടന്ന എല്ലാ മത്സരത്തിലും തിളങ്ങിയ ബാറ്റിംഗ് പ്രതിഭ ഷെഫാലിവെര്‍മയെ വെറും 2 റണ്‍സിന് പുറത്താക്കിക്കൊണ്ട് ഓസ്‌ട്രേലിയ തന്ത്രം വിജയിപ്പിച്ചു. തുടര്‍ന്ന് ഒന്നിനുപുറകേ ഒന്നായി മുന്‍ നിരതാരങ്ങളെല്ലാം സമ്മര്‍ദ്ദത്തെ അതിജീവിക്കാനാകാതെ വീണു. 58ന് 5 എന്ന നിലയില്‍ നിന്ന് 99ല്‍ ഇന്ത്യ പുറത്തായി. സ്മൃതി മന്ഥാന(11)ക്ക് ശേഷം മധ്യനിരയില്‍ ദീപ്തി ശര്‍മ്മ(33), വേദാ കൃഷ്ണമൂര്‍ത്തി(19), റിച്ചാ ഘോഷ്(18) എന്നിവര്‍ മാത്രമാണ് രണ്ടക്കം കടന്നത്. ബാറ്റിംഗ് നെടും തൂണുകളായ ജാമിയ റോഡ്രിഗ്‌സും(0), ക്യാപ്റ്റന്‍ ഹര്‍മന്‍പ്രീതും(4) പെട്ടന്ന് പുറത്തായതോടെ ഇന്ത്യയുടെ നടുവൊടിഞ്ഞു. യാതൊരു പോരാട്ട വീര്യവും കാണിക്കാതെയുള്ള ഇന്ത്യന്‍ വനിതകളുടെ കീഴടങ്ങല്‍ കാണികളേയും നിരാശരാക്കി. കളിയിലെ താരമായി ഓസീസിന്റെ അലീസാ ഹെയ്‌ലിയേയും ലോകകപ്പിലെ താരമായി ബേത് മൂണിയേയും പ്രഖ്യാപിച്ചു.
