ചെന്നൈ : കൊറോണ എന്ന മഹാമാരിയെ നേരിടാൻ തങ്ങളാൽ ആവുന്നതെല്ലാം ചെയ്യുകയാണ് രാജ്യത്തെ ഓരോ പൗരന്മാരും. ദുരിതാശ്വാസ പ്രവര്ത്തനങ്ങള്ക്ക് സഹായ ഹസ്തവുമായി നിരവധി താരങ്ങളും എത്തിയിട്ടുണ്ട്. ഏറ്റവും ഒടുവില് തമിഴ് നടന് അജിത് നല്കിയ സംഭാവനയാണ് വാര്ത്തയായത്. ഒന്നേകാൽ കോടി രൂപയാണ് അജിത് ദുരിതാശ്വാസ നിധിയിലേക്ക് കൈമാറിയത്.
പ്രധാനമന്ത്രിയുടെ പിഎം കെയർ ഫണ്ടിലേക്ക് 50 ലക്ഷം രൂപയും മുഖ്യമന്ത്രിയുടെ ദുരിതാശ്വാസ ഫണ്ടിലേക്ക് 50 ലക്ഷം രൂപയും നൽകിയ അജിത് സിനിമ സംഘടനക്ക് 25 ലക്ഷം രൂപയും നൽകി. സിനിമാ രംഗത്ത് പ്രവര്ത്തക്കുന്ന ദിവസ വേതനക്കാരെ സഹായിക്കാന് സംഭാവന ചെയ്യണമെന്ന് ഫിലിം എംപ്ലോയിസ് ഫെഡറേഷന് ഓഫ് സൗത്ത് ഇന്ത്യ (ഫെഫ്സി) ആവശ്യപ്പെട്ടിരുന്നു. ഇക്കാര്യം പരിഗണിച്ചാണ് സംഘടനയ്ക്ക് അജിത് 25 ലക്ഷം നല്കിയത്. ലോക്ക് ഡൗണ് പ്രഖ്യാപിച്ച സാഹചര്യത്തില് സിനിമാ മേഖല സ്തംഭിച്ചിരിക്കുകയാണ്.
നയൻതാര 20 ലക്ഷം രൂപയാണ് ഫെഫ്സിക്ക് നല്കിയത്. നേരത്തെ രജനികാന്ത്, കമല്ഹാസന്, ധനുഷ്, സൂര്യ, കാര്ത്തി എന്നിവരും സിനിമാ സംഘടനയ്ക്ക് സഹായം നല്കിയിരുന്നു.
