ന്യൂഡല്‍ഹി: ഹരിയാനയിലെ ഝജ്ജാര്‍ മേഖലയില്‍ താമസിക്കുന്ന മനു ഭാക്കേറിനാണ് കൊറോണക്കാലം വ്യത്യസ്തമാകുന്നത്. 10 മീറ്റര്‍ എയര്‍പിസ്റ്റളിലെ ജൂനിയര്‍ വനിതാ ലോകചാമ്പ്യനാണ് മനു.ഇന്ത്യയുടെ ഷൂട്ടിംഗ് ഒളിമ്പിക്‌സിലെ മെഡല്‍ പ്രതീക്ഷയായ വനിതാതാരത്തിന് തടസ്സം ഒരു കൂട്ടം കുരങ്ങന്മാരാണെന്നതും ലോക്ഡൗണിന്റെ പ്രത്യേകതയാവുകയാണ്.
രാവിലെ രണ്ടുമണിക്കൂര്‍ പഠനവും തുടര്‍ന്ന് രാമായണം സീരിയലുമാണ് നിലവിലെ പരിപാടിയെന്നാണ് മനുവിന്റെ വെളിപ്പെടുത്തല്‍. പ്രഭാത ഭക്ഷണം കഴിഞ്ഞാല്‍ നേരെ വീട്ടിന്റെ പിന്‍ഭാഗത്ത് തയ്യാറാക്കിയ പ്രത്യേകം ഷൂട്ടിംഗ് റേഞ്ചിലാണ് പരിശീലനം. നാലു മണിക്കൂര്‍ വരെ പരിശീലനം നിലവില്‍ ചെയ്യുന്നതായി താരം പറഞ്ഞു.
കൃത്യത പരീക്ഷിക്കുന്ന ബോര്‍ഡും കയറുമെല്ലാം പക്ഷെ ഒരു കൂട്ടര്‍ ദിവസവും രാത്രിവന്ന് പരിശോധിക്കുന്നതാണ് ഇപ്പോള്‍ തലവേദനയായിരിക്കുന്നത്. മറ്റാരുമല്ല പുറകിലുള്ള വനപ്രദേശത്തുനിന്നുമെത്തുന്ന കുരങ്ങന്മാരുടെ കൂട്ടമാണിത് ചെയ്യുന്നത്. വെടിവയ്പിനുള്ള സകല സംവിധാനവും പരിശോധിച്ച് വലിച്ചെറിയുന്നതിനാല്‍ ഇരട്ടിപ്പണിയാണെന്നാണ് മനുവിന്റെ പരാതി.
കഴിഞ്ഞ വര്‍ഷം തന്നെ ഒളിമ്പിക്‌സ് യോഗ്യത നേടിക്കഴിഞ്ഞ താരം ഇത്തവണ കൊറോണ മൂലം ഒളിമ്പിക്‌സ് നീട്ടിവക്കപ്പെട്ടതിന്റെ നിരാശയിലാണ്. മ്യൂണിച്ചില്‍ നടക്കാനുള്ള ഷൂട്ടിംഗ് ലോകകപ്പിനും ഡല്‍ഹി ഷൂട്ടിംഗ് ലോകപോരാട്ടത്തിലും മികച്ച പ്രകടനം നടത്തണമെന്നാണ് മനുവിന്റെ ആഗ്രഹം.
