ന്യൂഡല്ഹി: മഡഗാസ്കറിലെ ഇന്ത്യന് നയതന്ത്ര പ്രതിനിധി രചിച്ച ഗാനം ഭൂമി ഗീതമാക്കി ഐക്യരാഷ്ട്ര സഭ. മഡഗാസ്കറിലെ ഇന്ത്യന് നയതന്ത്ര പ്രതിനിധി അഭയ് കുമാര് രചിച്ച ഗാനമാണ് യുഎന് ഭൂമി ഗീതമാക്കിയത്. 2008 ല് റഷ്യയിലെ സെന്റ് പീറ്റേഴ്സ് ബര്ഗില് വെച്ചാണ് അഭയ് കുമാര് ഗാനം രചിച്ചത്.
ഭൗമ ദിനത്തോട് അനുബന്ധിച്ച് ഇന്ന് ഈ ഗാനം ആഗോള തലത്തില് റിലീസ് ചെയ്യാനാണ് ഐക്യരാഷ്ട്ര സഭയുടെ തീരുമാനം. ന്യൂയോര്ക്കില് ഗാനം റിലീസ് ചെയ്യുമ്പോള് യുഎന് ഡിപ്പാര്ട്ട്മെന്റ് ഓഫ് ഗ്ലോബല് കമ്മ്യൂണിക്കേഷന് സിവില് സൊസൈറ്റി യൂത്ത് റെപ്രസെന്റേറ്റീവ്സിന്റെ ഫേസ്ബുക്ക് പേജില് ഇത് സംപ്രേക്ഷണം ചെയ്യും.
കൊറോണ വൈറസിന്റെ ആഗോള വ്യാപനം പരസ്പര സഹകരണത്തിന്റെ പ്രധാന്യം ഒരിക്കല് കൂടി തെളിയിച്ചിരിക്കുകയാണെന്ന് അഭയ് കുമാര് വ്യക്തമാക്കി. ഏത് രാജ്യത്ത് നിന്നുള്ളവരാണെങ്കിലും ഈ പ്രതിസന്ധിയില് ആര്ക്കും നിസംഗത പ്രകടിപ്പിക്കാനാകില്ലെന്നും അദ്ദേഹം പറഞ്ഞു. മലിനീകരണം, കാലാവസ്ഥാ വ്യതിയാനം, ജൈവവൈവിധ്യത്തിന്റെ ശോഷണം എന്നിവയെല്ലാം നമ്മളെയെല്ലാവരേയും ബാധിക്കുന്നതാണ്. എല്ലാവരും പരസ്പരാശ്രിതമാണ് പൂര്ണ അര്ത്ഥത്തില് മനസിലാക്കുന്നത് വരെ ഈ പ്രതിസന്ധിയൊന്നും നേരിടാന് സാധിക്കില്ലെന്നും അദ്ദേഹം കൂട്ടിച്ചേര്ത്തു.
