കണ്ണൂർ: സി. സദാനന്ദൻ മാസ്റ്റർ എംപിയുടെ ഇടപെടൽ വിജയം കണ്ടു. തലശ്ശേരി റെയിൽവേ സ്റ്റേഷനിൽ പാർസൽ സർവീസ് തുടരുമെന്ന് ദക്ഷിണ റെയിൽവേ ഔദ്യോഗികമായി അറിയിച്ചു. ദക്ഷിണ റെയിൽവേ ചീഫ് കൊമേഴ്സ്യൽ മാനേജരാണ് ഇതുസംബന്ധിച്ച തീരുമാനം അറിയിച്ചത്.
സി. സദാനന്ദൻ മാസ്റ്റർ നടത്തിയ ഇടപെടലിനെ തുടർന്നാണ് റെയിൽവേയുടെ നടപടി. തലശ്ശേരി റെയിൽവേ സ്റ്റേഷനിലെ പാർസൽ സർവീസ് നിർത്താനുള്ള തീരുമാനം പുനഃപരിശോധിക്കണമെന്ന് ആവശ്യപ്പെട്ട് എംപി കേന്ദ്ര റെയിൽവേ മന്ത്രി അശ്വിനി വൈഷ്ണവിന് കത്ത് നൽകിയിരുന്നു. പാർസൽ സർവീസ് നിർത്താനുള്ള നീക്കം വ്യാപാരികളെയും പൊതുജനങ്ങളെയും പ്രതികൂലമായി ബാധിക്കുമെന്ന ആശങ്ക എംപി റെയിൽവേ മന്ത്രിയുടെ ശ്രദ്ധയിൽപ്പെടുത്തിയിരുന്നു.
തുടർന്നാണ് വിഷയം ദക്ഷിണ റെയിൽവേ പരിശോധിക്കുകയും സർവീസ് തുടരാൻ തീരുമാനിക്കുകയും ചെയ്തത്. തീരുമാനം തലശ്ശേരിയിലെയും സമീപ പ്രദേശങ്ങളിലെയും വ്യാപാരികൾക്കും പാർസൽ സേവനത്തെ ആശ്രയിക്കുന്ന യാത്രക്കാർക്കും ആശ്വാസമാകും.
