തിരുവനന്തപുരം: റെക്കോഡുകള്‍ ഭേദിച്ച് സ്വര്‍ണവില കുതിക്കുന്നു. പവന് 35,040 രൂപയാണ് ഇന്നത്തെ വില. ഗ്രാമിന് 4,380 രൂപയും. പവന് 34,800 രൂപയായിരുന്നു കഴിഞ്ഞ ദിവസത്തെ സ്വര്‍ണ വില.
കൊറോണ വൈറസ് വ്യാപനത്തെ തുടര്‍ന്ന് ആഗോള സാമ്പത്തിക മേഖലയിലെ പ്രത്യാഘാതങ്ങളാണ് സ്വര്‍ണത്തിന്റെ വില ഉയരാന്‍ കാരണം. സുരക്ഷിത നിക്ഷേപം എന്ന നിലയില്‍ ആഗോള നിക്ഷേപകര്‍ സ്വര്‍ണം വാങ്ങിക്കൂട്ടുന്നതും സ്വര്‍ണ വില ഉയരാന്‍ കാരണം ആയി.
ഓണ്‍ലൈന്‍ ട്രേഡിംഗില്‍ സ്വര്‍ണ വിപണി സജീവമായതും വില ഉയര്‍ത്തി. അപകട സാധ്യത കൂടുതലുള്ള അസറ്റ് ക്ലാസുകളില്‍ നിന്നും നിക്ഷേപകര്‍ ഡോളര്‍, സ്വര്‍ണം തുടങ്ങിയ സുരക്ഷിത താവളങ്ങളിലേക്ക് മാറുകയാണെന്നാണ് വിദഗ്ധര്‍ പറയുന്നത്. അന്താരാഷ്ട്ര വിപണിയില്‍ ട്രോയ് ഔണ്‍സ് സ്വര്‍ണത്തിന് 1750 ഡോളറാണ് നിരക്ക്.
അതേസമയം സംസ്ഥാനത്ത് ചെറിയ സ്വര്‍ണ കടകള്‍ തുറന്നെങ്കിലും വാങ്ങുന്നവരുടെ എണ്ണം കുറവാണെന്നാണ് വ്യാപാരികള്‍ പറയുന്നത്. സ്വര്‍ണത്തിന്റെ ഉയര്‍ന്ന വിലയും സാമ്പത്തിക പ്രതിസന്ധിയുമാണ് ഉപഭോക്താക്കളെ അകറ്റുന്നതെന്നും ഇവര്‍ പറയുന്നു.
