ക്രൈസ്റ്റ്ചര്‍ച്ച്: ഇന്ത്യന്‍ പ്രീമിയര്‍ ലീഗിന്റെ വേദിയാകുമെന്ന് ഒരിക്കലും പറഞ്ഞിട്ടില്ലെന്ന് ന്യൂസിലാന്‍ഡ്. നിലവില്‍ ഉയര്‍ന്നുവരുന്ന വാര്‍ത്തകളെല്ലാം വെറും ഊഹാപോഹമാണെന്നും ന്യൂസിലാന്റ് ക്രിക്കറ്റ് ബോര്‍ഡ് അറിയിച്ചു. ഐ.പി.എല്ലിനായി ബി.സി.സി.ഐയുമായി യാതൊരു ചര്‍ച്ചകളും നടന്നിട്ടില്ലെന്നും ന്യൂസിലാന്‍ഡ് ക്രിക്കറ്റ് ബോര്‍ഡിന്റെ വക്താവ് റിച്ചാര്‍ഡ് ബൂക്‌സ് പറഞ്ഞു.
‘ഇന്ത്യയില്‍ നടക്കുന്ന പ്രീമിയര്‍ ലീഗ് മത്സരങ്ങള്‍ ന്യൂസിലാന്‍ഡില്‍ നടത്തുക എന്നത് തികച്ചും അപ്രായോഗികമാണ്. മാത്രമല്ല തങ്ങള്‍ മുന്‍കൂട്ടി അനുമതി നല്‍കിയിരിക്കുന്ന പരമ്പരകള്‍ക്കും അത്തരം തീരുമാനം തടസ്സമാകും. ഇതുവരെ അത്തരം ഒരു കാര്യവും ചിന്തിച്ചില്ല.’ റിച്ചാര്‍ഡ് ബൂക്‌സ് പറഞ്ഞു.
ഇന്ത്യയില്‍ ഐ.പി.എല്‍ നടത്താന്‍ സാധിക്കില്ലെങ്കില്‍ യു.എ.ഇ, ശ്രീലങ്ക എന്നീ രാജ്യങ്ങള്‍ക്കൊപ്പം ന്യൂസിലാന്റും വേദിയാകാന്‍ ഒരുക്കമാണെന്ന വാര്‍ത്തയാണ് പ്രചരിച്ചത്. ഇതിന് പിന്നാലെയാണ് ബി.സി.സി.ഐയുടെ പേരില്‍ വന്ന പ്രസ്താവനയോട് വിയോജിപ്പ് പ്രകടിപ്പിച്ച് ബൂക്‌സ് രംഗത്തുവന്നത്.
