ചൈനീസ് ആപ്പുകൾക്ക് കേന്ദ്ര സർക്കാർ വിലക്കേർപ്പെടുത്തിയതിന് പിന്നാലെ ചൈനീസ് ഉത്പ്പന്നങ്ങൾ ബഹിഷ്ക്കരിക്കാൻ ആഹ്വാനവുമായി രാഷ്ട്രീയ പാർട്ടികളടക്കം രംഗത്തെത്തിയിരുന്നു. ഇതിന്റെ ഭാഗമായി ചൈന ആസ്ഥാനമായി ഇന്ത്യയിൽ പ്രവർത്തിക്കുന്ന നിരവധി കമ്പനികൾക്ക് വൻ നഷ്ടമാണുണ്ടായത്. അതിർത്തിയിൽ ചൈന ഇന്ത്യക്കെതിരെ ആക്രമണം നടത്തിയതും ബഹിഷ്ക്കരണത്തിന് കാരമായിരുന്നു.
ഇപ്പോഴിതാ ‘ബോയ്ക്കോട്ട് ചൈന’ പ്രമേയമായെത്തിയ ഹ്രസ്വ ചിത്രം സാമൂഹിക മാദ്ധ്യമങ്ങളിൽ ശ്രദ്ധ നേടുകയാണ്. ഈ ഏറ്റുമുട്ടലില് നാം ഓരോര്ത്തര്ക്കും എന്ത് ചെയ്യാന് കഴിയും എന്ന് വളരെ ലളിതമായി കാണിച്ചു തരികയാണ് ‘ഇന്ത്യന് പ്രതികാരം’ എന്ന കലാഭവന് ഹനീഫ് അഭിനയിച്ച ഷോര്ട്ട്ഫിലിം. ചൈനീസ് ഉത്പന്നങ്ങള് ബഹിഷ്കരണത്തിലൂടെ നന്മയിൽ കുതിർന്ന ഒരു പ്രതികാരം ഒരു സാധാരണക്കാരന് നടത്തുന്നതാണ് ഈ ഷോര്ട്ട്ഫിലിം പറയുന്നത്.
‘നിങ്ങളും അണിചേരും ഈ ഇന്ത്യന് പൗരനൊപ്പം’ എന്ന ക്യാപ്ഷന് ഈ ഷോര്ട്ട്ഫിലിം കാണുന്നവര്ക്ക് ശരിയാണെന്ന് തോന്നുന്ന രീതിയിലാണ് ഈ ചിത്രത്തിന്റെ അവരതരണം. മഹേഷ് ശര്മ്മ കഥയെഴുതി സംവിധാനം ചെയ്ത് നിര്മ്മിച്ച ഈ ചിത്രത്തില് കലാഭവന് ഹനീഫിന് പുറമെ, മാസ്റ്റര് അമര്നാഥും പ്രധാന കഥാപാത്രമായി എത്തുന്നു. ഒട്ടേറെ ചിത്രങ്ങളിലൂടെ സുപരിചിതനായ കലാഭവന് ഹനീഫിന്റെ അഭിനയവും ലളിതവും പ്രധാനവുമായ ആശയവുമാണ് ഈ ഷോര്ട്ട് ഫിലിമിനെ ശ്രദ്ധേയമാക്കുന്നത്. ചലച്ചിത്ര താരം മമ്മൂട്ടിയാണ് തന്റെ ഫേസ്ബുക്ക് പേജിലൂടെ ഈ ചിത്രം പുറത്തിറക്കിയത്.
