നല്ല പൂ പോലെയുള്ള ഇഡ്ഡലിയും ,സാമ്പാറും കേൾക്കുമ്പോൾ തന്നെ വയറു നിറയുന്ന സന്തോഷം അല്ലേ , മലയാളിയുടെ വികാരം തന്നെ ആണ് ഇഡ്ഡലി എന്നു പറയാം. ആ കൂട്ടത്തിലും ഒരു താരമുണ്ട് വെറും താരമല്ല സൂപ്പർ താരം അതാണ് രാമശ്ശേരി ഇഡ്ഡലി.
ഒരു ഏച്ചുകെട്ടലുകളും ഇല്ലാത്ത ഒരു സാധാരണ ഗ്രാമത്തിനെ , ഭാരതത്തിന്റെ ഭക്ഷണ ഭൂപടത്തില് അടയാളപ്പെടുത്തിയത് , ആ ഗ്രാമത്തിലെ ചുരുക്കം ചില വീട്ടുകാര് മാത്രം ഉണ്ടാക്കുന്ന ഒരു ഇഡ്ഡലി ആണ്… രാമശ്ശേരി ഇഡ്ഡലി. പാലക്കാട് – പൊള്ളാച്ചി റോഡിലൂടെ ഒരു അര മണിക്കൂര് സഞ്ചരിച്ചാല് എലപ്പുള്ളിക്കടുത്തുള്ള രാമശ്ശേരിയില് എത്താം.ശാന്തമായ , നെല്പ്പാടങ്ങളുള്ള, പാലക്കാടിന്റെ എല്ലാ നന്മകളെയും ചേര്ത്ത് പിടിച്ച ഒരു ഗ്രാമം.
രാമശ്ശേരി ഇഡ്ഡലിയുടെ കഥ തുടങ്ങുന്നത് ഒരുപാട് വര്ഷങ്ങള്ക്ക് മുന്പാണ്. തമിഴ് നാട്ടില് നിന്നും കുടിയേറിപാര്ത്ത മുതലിയാര് സമുദായത്തില്പ്പെട്ടവരാണ് ഈ ഇഡ്ഡലിയെ രാമശ്ശേരിയില് എത്തിച്ചത്. പതിയെ പതിയെ രാമശ്ശേരി ഇഡ്ഡലിയുടെ പെരുമ രാമശ്ശേരിയും കടന്നു സഞ്ചരിച്ചു. ദൂരസ്ഥലങ്ങളില് നിന്നു പോലും വിനോദ സഞ്ചാരികളും ഭക്ഷണ പ്രിയരും ഇഡ്ഡലി തേടി ഈ കൊച്ചു ഗ്രാമത്തില് എത്തുന്നു.
രാമശ്ശേരിയില് മുതലിയാര് സമുദായത്തില് പെട്ട ചുരുക്കം ചില വീട്ടുകാര് മാത്രമേ ഇപ്പോള് ഇത് ഉണ്ടാക്കുന്നുള്ളൂ. വലിയ ആര്ഭാടങ്ങളില്ലാതെ അത് അവര് വിളമ്പുന്നു. ഈ ഇഡ്ഡലിയുടെ പ്രത്യേകത അതിന്റെ ആകൃതിയും മൃദുത്വവും തന്നെ ആണ്. രുചിയുടെ കാര്യം പിന്നെ പറയണ്ടല്ലോ. ഒരു കുട്ടി ദോശയെ അനുസ്മരിപ്പിക്കും ഈ ഇഡ്ഡലി. പൂവുപോലെ മൃദുലവും ആയിരിക്കും. തേങ്ങ ചമ്മന്തിയും, സാമ്പാറും പിന്നെ ഒരു സ്പെഷ്യല് ചമ്മന്തി പൊടിയും ഇതിനെ കൂടുതല് രുചികരമാക്കുന്നു.
ഇത് ഉണ്ടാക്കുന്നതും ഒരു പ്രത്യേക രീതിയില് ആണ്. ഈ രീതി തന്നെ ആയിരിക്കാം അതിനെ കൂടുതല് വ്യത്യസ്തമാക്കുന്നതും. സാധാരണ ഇഡ്ഡലി ഉണ്ടാക്കുന്നതുപോലെ , ഒരു ഇഡ്ഡലി തട്ടില് ഒഴിച്ച് എളുപ്പം ഉണ്ടാക്കാവുന്ന ഒന്നല്ല ഇത്. ആദ്യം ഒരു കലത്തില് വെള്ളം തിളപ്പിക്കുന്നു. ഇതിനുമുകളിലേക്ക് ഒരു മണ് ചട്ടിയുടെ പൊട്ടിച്ചെടുത്ത വായ്ഭാഗത്തില് നൂലുകള് വരിഞ്ഞു വെയ്ക്കുന്നു.ഇതിന് മുകളിലേക്കു ഒരു നനഞ്ഞ തുണി വിരിക്കുന്നു.അതിലേക്കു മാവ് കോരിയൊഴിച്ചു ചെറുതായി പരത്തുന്നു. ശേഷം അടച്ചുവെയ്ക്കുന്നു.ഇങ്ങനെ ഒരു കലത്തില് മൂന്നോ നാലോ ഇഡ്ഡലികള് ഉണ്ടാക്കാം. 10 കിലോ അരിക്ക് 2 കിലോ ഉഴുന്ന് എന്നതാണു അനുപാതം.ഒരല്പ്പം ഉലുവയും ഉഴുന്നിന്റെ കൂടെ അരയ്ക്കുന്നു.
പണ്ടൊക്കെ പുളിമരത്തിന്റെ വിറകു കത്തിച്ച് അടുപ്പിലായിരുന്നു ഇത് പാകം ചെയ്തിരുന്നത്. അന്നൊക്കെ ഒരാഴ്ച വരെ ഇത് കേടുകൂടാതെ ഇരിക്കും എന്നാണ് പറയപ്പെടുന്നത്. ഇപ്പോള് ചില കുടുംബങ്ങളെങ്കിലും ഗ്യാസടുപ്പിലേക്ക് മാറിയിട്ടുണ്ട്.
എന്നാലും എന്താണ് ഇതിന്റെ രഹസ്യമെന്ന് ചോദിച്ചാല് ഒന്നുമില്ലെന്ന് രാമശ്ശേരിക്കാര് പറയും. അവരുടെ അടുക്കളയിലേക്ക് കൂട്ടികൊണ്ടുപോയി ഉണ്ടാക്കുന്ന വിധം ഒരു മറയുമില്ലാതെ കാണിച്ചുതരും. അപ്പോഴും നമുക്ക് സംശയം ബാക്കി നില്ക്കും. എന്തോ ഒരു രഹസ്യ ചേരുവ കൂടി ചേര്ക്കുന്നില്ലേ? ഉണ്ട് , തീര്ച്ചയായും ഉണ്ട്. കഠിനധ്വാനവും എളിമയും പിന്നെ കളങ്കമില്ലാത്ത സ്നേഹവും , കൈപ്പുണ്യവും ഇതാണ് ആ രഹസ്യ ചേരുവകള്. പിന്നെ വിളമ്പുമ്പോള് ബഹുമാനത്തിന്റെ മേമ്പൊടി കൂടെ അല്പ്പം തൂവുന്നു. അങ്ങനെ അത് രാമശ്ശേരിയുടെ തനതായ സ്വാദാകുന്നു. ഭക്ഷണ പ്രിയരുടെ പ്രിയപ്പെട്ട ഇഡ്ഡലിയാകുന്നു.