വാഹനപ്രേമികൾ ഏറെ കാത്തിരിക്കുന്ന മഹീന്ദ്ര ഥാർ 2020 മോഡൽ വിപണിയിൽ എത്താൻ ദിവസങ്ങൾ മാത്രം. ഒരു വർഷത്തിലേറെയായി പരീക്ഷണയോട്ടത്തിലായിരുന്നു ഈ മോഡൽ. നേരത്തെ തന്നെ വാഹനം വിപണിയിൽ എത്തുമെന്ന് പ്രതീക്ഷിച്ചിരുന്നുവെങ്കിലും ഇപ്പോഴത്തെ സാഹചര്യത്തിൽ വിപണിയിലേക്കുള്ള അരങ്ങേറ്റം വൈകുകയായിരുന്നു. ആഗസ്റ്റ് 15 ന് സ്വാതന്ത്രദിനത്തോടനുബന്ധിച്ച് വാഹനം വിപണിയിൽ എത്താൻ സാധ്യതയുണ്ടെന്നാണ് ടീം ബിഎച്ച്പിയുടെ റിപ്പോർട്ട്.
നിലവിലെ സാഹചര്യം അനുസരിച്ച് മിക്ക നിർമാതാക്കളും പുതിയ മോഡലുകളെ അവതരിപ്പിക്കുന്നത് ഡിജിറ്റൽ വഴിയായതിനാൽ 2020 മഹീന്ദ്ര ഥാർ മോഡലിന്റെയും വിപണിയിലേക്കുള്ള അരങ്ങേറ്റം ഡിജിറ്റൽ വഴി തന്നെയായിരിക്കും.
പെട്രോൾ, ഡീസൽ ഓപ്ഷനുകളിൽ ആണ് 2020 മഹീന്ദ്ര ഥാർ ഒരുക്കിയിരിക്കുന്നത്. 140bhp കരുത്ത് ഉൽപ്പാദിപ്പിക്കാൻ ശേഷിയുള്ള 2.0 ലിറ്റർ ടർബോ ഡീസൽ യൂണിറ്റും 180bhp കരുത്ത് ഉൽപ്പാദിപ്പിക്കാൻ ശേഷിയുള്ള 2.0 ലിറ്റർ TGDi എംസ്റ്റാലിയൻ ടർബോ പെട്രോൾ എഞ്ചിനും ഉൾപ്പെടുന്ന വാഹനം വൈകാതെ തന്നെ നമുക്ക് നിരത്തുകളിൽ കാണാവുന്നതാണ്.
ജീപ്പ് ടാങ്ക്ലറുമായി സാമ്യമുള്ള തലയെടുപ്പാണ് 2020 മഹീന്ദ്ര ഥാറിന്റേത്. സോഫ്റ്റ് ടോപ്പ് പതിപ്പിൽ മാത്രം വിപണിയിൽ എത്തിയിരുന്ന വാഹനത്തിന്റെ ഹാർഡ് ടോപ്പും ഇത്തവണ ഇറങ്ങുന്നുണ്ട്. ഹാർഡ് ടോപ്പ് കൂടി രംഗത്തെത്തുന്നതോടെ വിപണിയിൽ വാഹനത്തിന് ആവശ്യക്കാർ ഏറും എന്നാണ് കമ്പനിയുടെ പ്രതീക്ഷ. മികച്ച ഡ്രൈവിംഗ് ഡൈനാമിക്സും ഓഫ് റോഡ് കഴിവും മെച്ചപ്പെടുത്തുന്നതിന് പുതിയ ലാഡർ ഫ്രെയിം ചാസിലാണ് വാഹനം നിർമിച്ചിരിക്കുന്നത്.
ഏകദേശം 10 മുതൽ 14 ലക്ഷം രൂപ വരെയാണ് വാഹനത്തിന്റെ വില പ്രതീക്ഷിക്കുന്നത്.
മുൻവശത്തെ പുത്തൻ ബമ്പറാണ് മറ്റൊരു പ്രത്യേകത. ഇതിന്റെ ഇരുവശങ്ങളിലുമായി ഒരുക്കിയിരിക്കുന്ന ഫോഗ് ലാമ്പ്, എൽഇഡി ഹെഡ്ലാമ്പ്, ഏഴ് സ്ലാറ്റ് ഗ്രിൽ, ടേൺ ഇന്റിക്കേറ്റർ എന്നിവയും വാഹനത്തിന്റെ പുതുമകളാണ്.
എൽഇഡി ടെയിൽലാമ്പുകൾ, ബമ്പർ ഡിസൈൻ എന്നീ പ്രത്യേകതകളാണ് വാഹനത്തിന്റെ പിൻ വശത്തെ മാറ്റങ്ങൾ. ഹാർഡ് ടോപ്പ് മോഡൽ ആയതിനാൽ ഗ്ലാസ്സിട്ട ഹാച്ച്ഡോർ, ഡോറിന് മധ്യഭാഗത്ത് സ്ഥാപിച്ചിരിക്കുന്ന സ്റ്റെപ്പിനി ടയർ, ബമ്പറിലെ റീഫ്ലക്ഷൻ എന്നിവയും വാഹനത്തിലെ പിന്നിലെ പുതുമകൾ ആണ്.
അകത്തളത്തെ മനോഹരമാക്കാനായി പുത്തൻ ഡാഷ്ബോർഡ് ഇൻഫോടെയ്ൻമെന്റ് സിസ്റ്റം, ക്ലൈമറ്റ് കണ്ട്രോൾ, ഫോർ വീൽ ഡ്രൈവ് ലിവർ, മൾട്ടി ഫങ്ഷൻ സ്റ്റിയറിങ് വീൽ, ക്യാപ്റ്റൻ സീറ്റ് എന്നിവയും ഒരുക്കിയിട്ടുണ്ട്.
