കൊറോണ കാലമായതുകൊണ്ട് പുറത്തുപോയി വന്നാൽ വാഹനങ്ങൾ സാനിറ്റൈസ് ചെയ്യുക എന്നത് വളരെ പ്രധാനമാണ്. ലോക്ക് ഡൗണിൽ ഇളവുകൾ വന്നതോടെ യാത്രകൾ കൂടി വരുന്ന സാഹചര്യമാണ് ഇപ്പോഴുള്ളത്. പല സ്ഥലങ്ങളിലൂടേയും കടന്നു പോകുന്ന വാഹനങ്ങൾക്ക് സ്വാഭാവികമായും കൊറോണയുടെ അണുക്കൾ കടന്നു കൂടാൻ സാധ്യതയുണ്ട്. അതുകൊണ്ട് തന്നെ വാഹനങ്ങൾ സാനിറ്റൈസ് ചെയ്യുന്നതിലൂടെ അണുക്കളെ ഇല്ലാതാക്കുന്നു. അതുവഴി ഇൻഫെക്ഷൻ പകർത്തുന്ന ബാക്ടീരിയ, വൈറസ്, ഫംഗസ് തുടങ്ങിയവയെ നശിപ്പിക്കാനും സാധിക്കും.
സാനിറ്റൈസ് ചെയ്യുമ്പോൾ കഴിയുന്നതും വാഹനങ്ങളുടെ എല്ലാ ഭാഗങ്ങളും തുടച്ചു വൃത്തിയാക്കണം. ഡോർ ഹാൻഡിൽ, ലോക്ക് അൺലോക്ക് ബട്ടൺ, ഗിയർ, മിററുകൾ, ബ്രേക്ക്, സിഗ്നൽ, ലൈറ്റ്, വിൻഡോകൾ, സ്റ്റീയറിങ്, വീലുകൾ, സീറ്റ് ബെൽറ്റ് തുടങ്ങി നിങ്ങൾ എവിടെയൊക്കെ തൊടുന്നുവോ അവിടെയെല്ലാം സാനിറ്റൈസ് ചെയ്യണം.
പൊതുവെ വാഹനങ്ങൾ സാനിറ്റൈസ് ചെയ്യുമ്പോൾ ഇന്റീരിയറിന് കേടുവരാത്ത രീതിയിലുള്ള ഡിസ്ഇൻഫെക്റ്റന്റ് സ്പ്രേ വേണം ഉപയോഗിക്കാൻ. ബ്ലീച്ച്, അമോണിയ, അസെറ്റോൺ, ക്ലോറിൻ തുടങ്ങിയവ വാഹനങ്ങൾക്ക് ഹാനികരമല്ലാത്ത ചേരുവകളാണ്. ഇതു വാഹനത്തിന്റെ പെയിന്റ് പോകാത്ത രീതിയിൽ ഉപയോഗിക്കാവുന്നതാണ്. ആദ്യം വാഹനത്തിന്റെ ചെറിയൊരു ഭാഗത്ത് പരീക്ഷണം നടത്തുക. ശേഷം ഇത്തരം ഡിസ്ഇൻഫെക്റ്റന്റ് സ്പ്രേ മൈക്രോ ഫൈബർ ടവ്വലിലേക്ക് സ്പ്രേ ചെയ്ത ശേഷം ടവൽ കൊണ്ട് തുടച്ച് വൃത്തിയാക്കാം.
ഇത്തരം കെമിക്കലുകളുടെ ഉപയോഗത്തോടെ വാഹനങ്ങളിൽ പറ്റികിടക്കുന്ന അണുക്കൾ പൂർണമായി ഇല്ലാതാക്കാൻ സാധിക്കും. വാഹനങ്ങൾ പൂർണമായി വൃത്തിയാക്കിയതിനുശേഷം നിങ്ങളുടെ കൈകൾ സോപ്പ് ഉപയോഗിച്ച് വൃത്തിയായി കഴുകുക. കൊറോണ കാലത്തിനുശേഷവും ഈ ശീലം തുടരുന്നത് എല്ലാ വിധ അണുക്കളിൽ നിന്നും രക്ഷ നേടാൻ നിങ്ങളെ സഹായിക്കും.
