സസ്യങ്ങളുടെ രാജ്ഞി എന്നറിയപ്പെടുന്ന തുളസി സ്വാഭാവികമായി രോഗങ്ങൾ ഭേദമാക്കാൻ കഴിവുള്ള ഔഷധസസ്യമായതിനാൽ ആയുർവേദ മരുന്നുകളിലും മറ്റും ധാരാളമായി ഉപയോഗിച്ച് പോരുന്നു . തുളസിയുടെ ഇലകൾക്ക് മാത്രമല്ല പൂവിനും ഔഷധഗുണമുള്ളതാണ് . പനി മുതൽ മൂത്രത്തിൽ ഉണ്ടാകുന്ന കല്ല് വരെ ചികിൽസിച്ചു ഭേദമാക്കാൻ കഴിവുള്ള പുണ്യ സസ്യമാണ് തുളസി.
ഹോളി ബേസിൽ എന്ന ഇംഗ്ലീഷ് നാമത്തിൽ അറിയപ്പെടുന്ന തുളസി , ലോകമൊട്ടാകെ നൂറ്റിഅൻപതോളം ഇനങ്ങളുള്ള പുതിന വർഗ്ഗത്തിൽ പെട്ട സസ്യമാണ് . ശരീരത്തു മുറിവുകൾ ഉണ്ടായാൽ തുളസിയിലയുടെ നീര് പുരട്ടുന്നത് വളരെ സാധാരണയായി ചെയ്തു വരുന്ന ഒരൊറ്റമൂലിയാണ്. ഇങ്ങിനെ തുളസിയില പിഴിഞ്ഞെടുക്കുന്ന നീര് മുറിവിൽ പുരട്ടുമ്പോൾ പ്രത്യേകതരം സുഗന്ധമുണ്ടാകുന്നതിനാൽ അത്ഭുതസസ്യം എന്നും തുളസിയെ വിശേഷിപ്പിക്കുന്നു .
ഇന്ത്യയിൽ പൊതുവെ പ്രചാരമുള്ളത് രാമതുളസി , കൃഷ്ണതുളസി , വനതുളസി എന്നറിയപ്പെടുന്ന മൂന്നിനം തുളസിയാണ് .
രാമതുളസി
ഇളം നീല നിറമുള്ള പുഷ്പങ്ങൾ ഉണ്ടാകുന്ന രാമതുളസി , പച്ചില തുളസി എന്നും അറിയപ്പെടുന്നു . ഗ്രാമ്പുവിന് സുഗന്ധം നൽകുന്ന യൂജിനോൾ ഇലകളിൽ അടങ്ങിയിരിക്കുന്നതിനാൽ രാമതുളസിക്ക് മനംമയപ്പിക്കുന്ന സുഗന്ധമാണുള്ളത് .
കൃഷ്ണതുളസി
നീല തുളസി എന്ന് അറിയപ്പെടുന്ന കൃഷ്ണതുളസിക്കും നല്ല വാസനയാണുള്ളത്. വായിലിട്ടു ചവക്കുമ്പോൾ ചവർപ്പ് തോന്നാമെങ്കിലും തൊണ്ട വേദന, ശ്വാസതടസം , ത്വക്രോഗങ്ങൾ . ചെവിക്കു വരുന്ന അസുഖങ്ങൾ എന്നിവക്ക് ഉത്തമ ഔഷധമാണ് തുളസിയില. തുളസി നീര് ചെവിവേദനക്കു ചെവിയിൽ ഒഴിക്കാൻ ഉപയോഗിക്കാറുണ്ട് . വയറിളക്കം , ഉറക്കക്കുറവ് എന്നിവക്കും ഉത്തമ ഔഷധമാണ് കൃഷ്ണതുളസി .
വനതുളസി
ഇന്ത്യ , ശ്രീലങ്ക, ആഫ്രിക്കയുടെ വടക്ക് കിഴക്കൻ ഭാഗങ്ങൾ എന്നിവടങ്ങളിൽ കാണുന്ന സസ്യമാണ് വനതുളസി . വനതുളസി കൂടുതലും ഔഷധമായി ഉപയോഗിക്കാൻ വേണ്ടിയാണ് വളർത്തുന്നത് . ധാരാളം സൂര്യപ്രകാശം ലഭിക്കുന്നിടത്തും അധികം ഈർപ്പം നിലനിൽക്കാത്തതുമായ പ്രദേശത്താണ് വനതുളസി നന്നായി തഴച്ചു വളരുക . ഇളം പച്ച നിറമുള്ള വനതുളസിയുടെ ഇലകൾ ചായയിലിട്ടു കുടിച്ചാൽ രോഗപ്രതിരോധശക്തി വർദ്ധിപ്പിക്കുകയും , രക്തത്തിൽ ഓക്സിജന്റെയും ധാതുക്കളുടെയും അളവ് കൂട്ടാൻ സഹായിക്കുകയും കൂടാതെ മാനസികോല്ലാസം പ്രധാനം ചെയ്യുകയും ചെയ്യുന്നു .
തുളസിയുടെ ഗുണങ്ങൾ
ചർമ്മത്തിൽ പുരട്ടാൻ പറ്റുന്ന ഏറ്റവും നല്ല ക്രീമാണ് തുളസി . മുഖക്കുരു , ചർമ്മത്തിൽ ഉണ്ടാകുന്ന അണുബാധ , കറുത്ത പാടുകൾ എന്നിവ മാറ്റി ചർമ്മത്തിന് തിളക്കവും, മൃദുത്വവും നൽകുന്നു .
തുളസി തലമുടി കഴുകാൻ ഉപയോഗിച്ചാൽ , തലയോട്ടി വരളാതെ നോക്കുകയും, താരൻ , മുടി കൊഴിച്ചിൽ , അകാല നര എന്നിവ തടയുകയും ചെയ്യുന്നു .
എന്നും വ്യായാമം ചെയ്യുന്നതോടൊപ്പം തുളസി അടങ്ങിയ ചായ രണ്ടു നേരം കുടിക്കുന്നത് അമിതവണ്ണം കുറക്കാൻ സഹായിക്കും. തുളസി ചായ ദഹനപ്രക്രിയ നന്നായി നടക്കുവാൻ സഹായിക്കുകയും തന്മൂലം ശരീരത്തിന് ആവശ്യമുള്ള ധാതുക്കളും മറ്റും ഭക്ഷണത്തിൽ നിന്ന് വലിച്ചെടുക്കാൻ സഹായിക്കുകയും ചെയ്യും .
കണ്ണുകൾ കഴുകാൻ ഏറ്റവും നല്ല ഔഷധമാണ് രാത്രി മുഴുവൻ തുളസിയില ഇട്ടു വെച്ച വെള്ളം . തുളസിയില ഇട്ട വെള്ളം കൊണ്ട് കണ്ണ് കഴുകിയാൽ കണ്ണുകൾക്ക് കുളിർമ്മയും , കണ്ണിനുണ്ടാകുന്ന ആയാസം കുറക്കുകയും ചെയ്യും .
