വിദേശ രാജ്യങ്ങളിലെ പാചകകുറിപ്പിൽ ഉള്ള സ്ഥിര സാന്നിധ്യമാണ് ഒലിവ് എണ്ണ . പോഷക സമൃദ്ധമായ ഒലിവ് കായ്കളും , കായ്കളിൽ നിന്നുല്പാദിപ്പിക്കപ്പെടുന്ന എണ്ണയും ഭക്ഷണത്തിൽ ഉൾപ്പെടുത്തുന്നത് വളരെ നല്ലതാണ് . ഇത് കൂടാതെ ചർമ്മകാന്തിയും മുഖകാന്തിയും നിലനിർത്താൻ വേണ്ടിയും ഒലിവ് എണ്ണ ഉപയോഗിച്ച് പോരുന്നു .
ഒലിവ് എണ്ണ നല്ലൊരു ആന്റിഓക്സിഡന്റ് ആയതിനാൽ ചർമ്മത്തിൽ ഉണ്ടാകുന്ന ദോഷകരമായ വസ്തുക്കളെ നീക്കം ചെയ്യുകയും തന്മൂലം ചർമ്മകോശങ്ങളെ സംരക്ഷിക്കുകയും യുവത്വം നിലനിർത്തുകയും ചെയ്യും .
ഒലിവ് എണ്ണയിൽ വിറ്റാമിൻ എ , ഡി , ഇ എന്നിവ അടങ്ങിയിരിക്കുന്നതിനാൽ , എക്സിമ , സോറിയാസിസ് തുടങ്ങിയ ചർമ്മരോഗങ്ങളിൽ സംരക്ഷണമേകും . കൂടാതെ വിറ്റാമിൻ കെ അടങ്ങിയിരിക്കുന്നതിനാൽ ചർമ്മത്തിൽ ഉണ്ടാകുന്ന പാടുകൾ പ്രത്യേകിച്ച് പ്രസവം കഴിഞ്ഞു സ്ത്രീകളുടെ വയറ്റിൽ ഉണ്ടാകുന്ന പാടുകൾ ഇല്ലാതാക്കാൻ നല്ലൊരു മാർഗം കൂടിയാണ് .
ബാക്റ്റീരിയകളെ നശിപ്പിക്കാനുള്ള ഗുണം ഒലിവ് എണ്ണയിൽ ഉള്ളതിനാൽ , രോഗാണുക്കൾ മൂലം ഉണ്ടാകുന്ന ചർമ്മ രോഗം, മുഖക്കുരു എന്നിവയെ ഇല്ലാതാക്കാൻ ഉത്തമമാണ് .
ഒലിവ് എണ്ണക്ക് ചർമ്മത്തിന്റെ ഈർപ്പം നിലനിർത്താനുള്ള കഴിവുള്ളതിനാൽ , മൃദുത്വവും കാന്തിയും കാത്തു സൂക്ഷിക്കും . ചർമ്മത്തിൽ ഉപയോഗിക്കുന്ന മറ്റ് എണ്ണകളെപ്പോലെ തന്നെ ഒലിവ് എണ്ണയും പ്രകൃതിദത്ത മോയ്സ്ചുറൈസറായി ഉപയോഗിക്കാം. ഇതിൽ അടങ്ങിയിരിക്കുന്ന ഒമേഗ 6, ഒമേഗ 9 ഫാറ്റി ആസിഡുകൾ ചർമ്മത്തിന്റെ ആരോഗ്യം വർദ്ധിപ്പിക്കും.
കട്ടിയായി ചെയ്യുന്ന മേക്ക് അപ്പ് ചർമ്മത്തിന് വരൾച്ചയുണ്ടാക്കുകയും അതേസമയം തന്നെ തുടച്ചു കളയാനും ബുദ്ധിമുട്ടുള്ള കാര്യമാണ് . വിലകൂടിയ റിമൂവറുകൾ ഉപയോഗിക്കുന്നതിന് പകരം ഒലിവ് എണ്ണ ഉപയോഗിച്ചാൽ ചർമ്മ കാന്തി നിലനിർത്തി കൊണ്ട് തന്നെ മുഖം വൃത്തിയാക്കാം .
കൺപോളകൾക്ക് താഴെയുണ്ടാകുന്ന കറുത്ത പാടിനും , വരണ്ട ചുണ്ടുകൾക്കും , കൈമുട്ടുകളിലും കാല്മുട്ടുകളിലും ഉണ്ടാകുന്ന വരണ്ട ചർമ്മത്തിനും ഒലിവ് എണ്ണ നല്ലൊരു മരുന്നാണ് .
Comments