ന്യൂഡല്‍ഹി:നേപ്പാളിലെ റെയില്‍വേ പദ്ധതികള്‍ പുന:രുജ്ജീവിപ്പിക്കാന്‍ സഹായവുമായി ഇന്ത്യ. ചൈന നിശ്ചലമാക്കിയ നിരവധി റെയില്‍വേ പദ്ധതികളും ഇന്ത്യ ഏറ്റെടുക്കുമെന്നും റെയില്‍വേ മന്ത്രാലയം അറിയിച്ചു. ചരിത്ര പ്രാധാന്യമുള്ള ജനക്പൂര്‍-ജയനഗര്‍ റെയില്‍വേ പദ്ധതിയാണ് ആദ്യമായി പ്രവര്‍ത്തിപ്പിക്കാന്‍ പാകത്തിനാക്കുന്നത്. നേപ്പാളിലെ റെയില്‍വേ ഉദ്യോഗസ്ഥര്‍ക്കും സാങ്കേതിവിദഗ്ദന്മാര്‍ക്കും പരിശീലനം നല്‍കുന്ന ആദ്യ ഘട്ടമാണ് നടപ്പാക്കുക, ആകെ 26 ജീവനക്കാരാണ് പരിശീലനത്തിനായി ഇന്ത്യയില്‍ നിന്നും നേപ്പാളിലേയ്‌ക്ക് പോകുന്നത്.
ഇന്ത്യയുമായി റെയില്‍വേ വികസനത്തിന് കരാര്‍ ഒപ്പിട്ടിട്ടുണ്ടെന്നും ഇന്ത്യന്‍ റെയില്‍വേ നല്‍കുന്ന എല്ലാ സാങ്കേതിക സഹായത്തിനും നന്ദിയുണ്ടെന്നും നേപ്പാള്‍ റെയില്‍വേ മന്ത്രി ബല്‍റാം മിശ്ര പറഞ്ഞു. പ്രധാനപ്പെട്ട 16 സ്ഥാനങ്ങളില്‍ ഇന്ത്യയില്‍ നിന്നും സാങ്കേതിക പരിജ്ഞാനമുള്ള ഉദ്യോഗസ്ഥരെ നിയമിക്കാനും നേപ്പാള്‍ തീരുമാനിച്ചിരിക്കുകയാണ്.
ഇന്ത്യയിലെ റെയില്‍വേ മന്ത്രാലയവുമായി വീഡിയോ കോണ്‍ഫറന്‍സ് വഴിയാണ് ധാരണയായത്. വേണ്ടത്ര പരിശീലനം ജീവനക്കാര്‍ക്ക് നല്‍കാന്‍ നേപ്പാളിന് കഴിയില്ല എന്നതിനാലാണ് ഇന്ത്യയുടെ സഹായം അഭ്യര്‍ത്ഥിച്ചിരിക്കുന്നത്. നേപ്പാള്‍ പൗരന്മാരെ റെയില്‍വേയ്‌ക്കായി തിരഞ്ഞെടുത്ത ശേഷം അവര്‍ക്കുള്ള പരിശീലനം നല്‍കാനാണ് ഇന്ത്യയുടെ സഹായം അഭ്യര്‍ത്ഥിച്ചിരിക്കുന്നതെന്നും മിശ്ര പറഞ്ഞു.
നേപ്പാളിലെ റെയില്‍വേ സംവിധാനത്തിനായി ബീഹാറിലേയ്‌ക്ക് കോച്ചുകള്‍ എത്തിയതായും റെയില്‍വേ അറിയിച്ചു. നേപ്പാള്‍ 84.65 കോടിരൂപയ്‌ക്കാണ് ആദ്യ പദ്ധതിയ്‌ക്കായി ഇന്ത്യയുമായി ധാരണയിലെത്തിയിരിക്കുന്നത്.
Comments