കാലാകാലങ്ങളായി മുഖസൗന്ദര്യത്തിനും ചർമ്മസൗന്ദര്യത്തിനും മാറ്റു കൂട്ടാൻ മഞ്ഞൾ പ്രത്യേകിച്ച് കസ്തൂരി മഞ്ഞൾ തേച്ചു കുളിക്കുന്നത് ഒരു ശീലം തന്നെയാണ് . കേരളത്തിൽ ഉടനീളം കൃഷി ചെയ്തു പോരുന്ന കർപ്പൂര ഗന്ധമുള്ള ഔഷധ സസ്യം കൂടിയാണ് കസ്തൂരി മഞ്ഞൾ .
മഞ്ഞ കൂവയെ പലപ്പോഴും കസ്തൂരി മഞ്ഞൾ ആയി തെറ്റിദ്ധരിക്കപ്പെടാറുണ്ട് അതിനാൽ തന്നെ വിപണികളിൽ പലപ്പോഴും കസ്തൂരി മഞ്ഞളിന് പകരം മഞ്ഞ കൂവയായിരിക്കും ലഭിക്കുക . പൂർണ്ണമായും മഞ്ഞ നിറമല്ല കസ്തൂരി മഞ്ഞളിനുള്ളത് പകരം ക്രീം നിറമാണ് കൂടാതെ കസ്തൂരി മഞ്ഞൾ പൊടിക്ക് ഒരു തരം ബ്രൗൺ നിറവും മഞ്ഞക്കൂവയുടെ പൊടിക്ക് മഞ്ഞ നിറവുമാണ് . അതിനാൽ ശ്രദ്ധിച്ചു വാങ്ങിയാൽ അബദ്ധം ഒഴിവാക്കാം .
കൂടുതലായും മുഖസൗന്ദര്യം കാത്തുസൂക്ഷിക്കാനാണ് പണ്ട് മുതൽക്കേ കസ്തൂരി മഞ്ഞൾ ഉപയോഗിച്ച് പോന്നിരുന്നത് . മുഖത്തെ പാടുകൾ മാറ്റാൻ , നിറം വർദ്ധിപ്പിക്കാൻ , കറുപ്പ് നിറം അകറ്റാൻ എന്നിവയ്ക്ക് അത്യുത്തമമാണ് കസ്തൂരി മഞ്ഞൾ . കസ്തൂരി മഞ്ഞൾ ഉപയോഗിക്കുമ്പോൾ ഉണ്ടാകുന്ന വ്യത്യാസം പെട്ടെന്ന് തന്നെ ദർശിക്കാൻ സാധിക്കും .
കസ്തൂരി മഞ്ഞൾ , രക്തചന്ദനം , പനിനീര് , പാൽ എന്നിവ ചേർത്തുണ്ടാക്കിയ മിശ്രിതം മുഖത്തു പുരട്ടുന്നത് വളരെയധികം പ്രയോജനം ചെയ്യും . കസ്തൂരി മഞ്ഞളും ചന്ദനവും ചേർത്ത മിശ്രിതം ശരീരത്തു തേച്ചു കുളിക്കുന്നത് ചർമ്മകാന്തി വർദ്ധിപ്പിക്കുന്നതിനും , ശരീരദുർഗന്ധം അകറ്റുന്നതിനും ഉത്തമമാണ് .
അഞ്ചാം പനി , ചിക്കൻ പോക്സ് തുടങ്ങിയ അസുഖങ്ങൾ മൂലം ഉണ്ടാകുന്ന പാടുകൾ നീക്കം ചെയ്യാൻ കസ്തൂരി മഞ്ഞൾ അരച്ച് പുരട്ടുന്നത് ഉത്തമമാണ് . പ്രസവനാന്തരം ദേഹ രക്ഷയുടെ ഭാഗമായി അമ്മയെയും കുഞ്ഞിനെയും കസ്തൂരി മഞ്ഞൾ തേച്ചു കുളിപ്പിക്കുന്നത് ചർമ്മകാന്തി വർദ്ധിപ്പിക്കുവാനും , ചർമ്മരോഗങ്ങൾ തടയുവാനും നല്ലതാണ് .
മഞ്ഞൾ കൃഷി ചെയ്യുന്ന അതേ രീതിയിൽ തന്നെ കസ്തൂരി മഞ്ഞളും വീട്ടു വളപ്പിൽ കൃഷി ചെയ്യാവുന്നതാണ് .
