ന്യൂഡല്‍ഹി: മുന്‍ രാഷ്‌ട്രപതി പ്രണാബ് മുഖര്‍ജിയുടെ സംസ്‌കാര ചടങ്ങുകള്‍ പൂര്‍ണ സൈനിക ബഹുമതികളോടെ നടന്നു. ഉച്ചയ്‌ക്ക് രണ്ടു മണിയോടെ ലോധി റോഡിലെ ശ്മശാനത്തിലായിരുന്നു സംസ്‌കാര ചടങ്ങുകള്‍. കേന്ദ്ര ആരോഗ്യ മന്ത്രാലയത്തിന്റെ എല്ലാ കൊറോണ മാര്‍ഗ നിര്‍ദ്ദേശങ്ങളും പാലിച്ചായിരുന്നു സംസ്‌കാര ചടങ്ങ് നടത്തിയത്.
ഔദ്യോഗിക ഗണ്‍ ക്യാരിയേജ് സംവിധാനത്തിലാണ് സാധാരണ മൃതദേഹം ശ്മശാനത്തിലേക്കെത്തിക്കുന്നത്. എന്നാല്‍ ഇത്തവണ കൊറോണ പ്രോട്ടോകോള്‍ നിലനില്‍ക്കുന്നതിനാല്‍ ഗണ്‍ക്യാരിയേജ് സംവിധാനത്തിന് പകരം വാനിലാണ് അദ്ദേഹത്തിന്റെ മൃതദേഹം ശ്മശാനത്തിലേക്കെത്തിച്ചത്.
ഇന്നലെ വൈകുന്നേരത്തോടെയാണ് പ്രണാബ് മുഖര്‍ജി അന്തരിച്ചത്. പ്രധാനമന്ത്രി നരേന്ദ്ര മോദി, രാഷ്‌ട്രപതി രാംനാഥ് കോവിന്ദ്, പ്രതിരോധ മന്ത്രി രാജ്‌നാഥ് സിംഗ് എന്നിവര്‍ അദ്ദേഹത്തിന് ആദരാഞ്ജലികള്‍ അര്‍പ്പിച്ചു. ഡല്‍ഹിയിലെ പ്രണാബ് മുഖര്‍ജിയുടെ വസതിയിലെത്തിയാണ് എല്ലാ പ്രമുഖ വ്യക്തികളും അദ്ദേഹത്തിന് അന്ത്യാഞ്ജലി അര്‍പ്പിച്ചത്.
