സാധാരണയായി നാടന് കറികളില് ഒന്നും തന്നെ കൂടുതലായി ഉപയോഗിക്കാത്ത ഒന്നാണ് കാപ്സിക്കം. കൂടുതലായും നോര്ത്ത് ഇന്ത്യന് വിഭാഗങ്ങളിലാണ് ഇതുപയോഗിച്ചു കാണുന്നത്. എടുത്തു പറയാവുന്ന മികച്ച ഗുണമോ, മണമോ, രുചിയോ കാപ്സിക്കത്തിനില്ല എന്നാണ് പൊതുവേയുള്ള ധാരണ. എന്നാല് ഇത് പൂര്ണ്ണമായും ശരിയല്ല. മിക്ക അസുഖങ്ങള്ക്കും ആരോഗ്യ പരിപാലനത്തിനും കാപ്സിക്കം കഴിക്കുന്നത് ഏറെ ഗുണപ്രദമാണ്.
ചുവപ്പ് , ഓറഞ്ച്, പച്ച എന്നിങ്ങനെ വ്യത്യസ്ത നിറങ്ങളിലുളള കാപ്സിക്കമുണ്ട്. ഓരോന്നും കഴിക്കുന്നതിലൂടെ വ്യത്യസ്ത തരത്തിലുള്ള പോഷക ഗുണങ്ങളാണ് ലഭിക്കുക. കാപ്സിക്കത്തില് ജീവകം ‘എ’,’സി’, ബി 6, ബി 9, ബി കോംപ്ലക്സ് എന്നിവ ഉയര്ന്ന അളവില് അടങ്ങിയിരിക്കുന്നു.
ഹൃദയത്തിന്റെ ആരോഗ്യത്തിന് പച്ച ക്യാപ്സിക്കം വളരെ നല്ലതാണ്. ഇതിലുളള ജീവകം ‘സി’ ഓറഞ്ചിലുള്ളതിനെക്കാള് മൂന്നിരട്ടിയാണ്. കാപ്സിക്കത്തില് അടങ്ങിയ ജീവകം ‘സി’യും ബീറ്റാകരോട്ടിനും അസ്നിഗ്മാറ്റിസം, തിമിരം തുടങ്ങിയ നേത്രരോഗങ്ങളെ പ്രതിരോധിക്കുന്നു. കാപ്സിക്കത്തിന്റെ നീര് ചേര്ത്ത വെള്ളം ഉപയോഗിച്ചു കവിള് കൊണ്ടാല് തൊണ്ടയിലെ ചെറിയ പ്രശ്നങ്ങള്ക്കും ഒച്ചയടപ്പിനും ശമനം കിട്ടും. മൈഗ്രേയ്ന് പോലുള്ള തലവേദനയ്ക്കും ഇത് നല്ലൊരു മരുന്നാണ്. കാപ്സിക്കത്തിന്റെ ജ്യൂസ് കുടിക്കുന്നത് കൊളസ്ട്രോള് കുറയ്ക്കാന് ഉപകരിക്കും.
ആര്ട്ടറി ദൃഢമായിപ്പോകുന്ന പ്രശ്നത്തെയും ഇതു തടയുന്നു. രക്തസമ്മര്ദ്ദം കുറയ്ക്കുന്നതിനും വിളര്ച്ചക്ക് ചുവപ്പ് കാപ്സിക്കം നല്ലൊരു ഔഷധമാണ്. ഫോളിക് ആസിഡും ജീവകം ബി 6 ഉം ഹീമോഗ്ലോബിന്റെ നിരപ്പ് കൂട്ടുന്നു. ഈ രണ്ടു ഘടകങ്ങളും ചുവപ്പു രക്തകോശങ്ങള് ഉണ്ടാകാന് വളരെ നല്ലതാണ്.ചുവപ്പ് കാപ്സിക്കം ഉണക്കിയ ശേഷം വെള്ളത്തിലിട്ട് തിളപ്പിച്ച് മുടിയില് തേച്ചു പിടിപ്പിക്കുക. 15 മിനിറ്റിന് ശേഷം മുടി കഴുകുക. ആഴ്ചയില് 2 തവണ ഇങ്ങനെ ചെയ്താല് മുടിവളര്ച്ചയും മുടിക്ക് ആരോഗ്യവും ലഭിക്കും.
