കൊറോണ വൈറസ് വ്യാപനം വില്ലനായതോടെയാണ് മാസ്കിന്റെ ഉപയോഗം സാധാരണക്കാർക്കിടയിലേയ്ക്കും വന്നെത്തിയത്. എന്നാൽ സുരക്ഷയ്ക്ക് ഉപയോഗിക്കുന്ന മാസ്ക് തന്നെ വില്ലനായാലോ…? ചിന്തിക്കേണ്ട കാര്യം തന്നെയാണ് ഇത്…ആവശ്യക്കാരുടെ എണ്ണം കൂടിയതോടെയും മാസ്കുകളുടെ എണ്ണം കൂടിയതോടെയും വഴിയോരങ്ങളിൽ വലിച്ചെറിയുന്ന മാസ്കുകളുടെ എണ്ണവും ദിനം പ്രതി ഉയരുന്നുണ്ട്. കുറച്ചു കൂടി വ്യക്തമായി പറഞ്ഞാൽ രോഗ വ്യാപനം കുറയ്ക്കാനുള്ള വസ്തു രോഗ കാരണമായി മാറുന്ന അവസ്ഥ. വഴിയോരങ്ങളിലും ജലാശയങ്ങളിലും ബസുകളിലും തീവണ്ടികളിലുമൊക്കെ നിരവധി ആളുകളാണ് തങ്ങൾ ഉപയോഗിച്ച മാസ്ക് ഉപേക്ഷിക്കുന്നത്.
നമുക്കിടയിൽ ഉപയോഗിക്കുന്ന ഏതുതരം മാസ്കും ബയോ മെഡിക്കൽ മാലിന്യമായതിനാൽ തന്നെ വെറുതെ വലിച്ചെറിയുന്നത് നമുക്കുതന്നെ അപകടമായി തീരുകയാണ് ചെയ്യുന്നത്. മാസ്കിന്റെ പുറംപാളിയിലെ രോഗാണുക്കൾ നശിക്കാതെ കിടക്കും. ഇത് രോഗ വ്യാപനത്തിനിടയാക്കും. വഴിയിൽ വലിച്ചെറിയുന്ന മാലിന്യങ്ങൾ ശേഖരിക്കാനുള്ള ഉത്തരവാദിത്വം തദ്ദേശ സ്ഥാപനങ്ങൾക്കാണ്. പക്ഷേ, കൊച്ചി കോർപ്പറേഷനു പോലും ബയോ മെഡിക്കൽ മാലിന്യ സംസ്കരണ സംവിധാനമില്ല. ബയോ മെഡിക്കൽ മാലിന്യം ബ്രഹ്മപുരത്ത് ചാക്കിലാക്കി പ്രത്യേകം സൂക്ഷിക്കുകയാണിപ്പോൾ.
മാസ്ക് എങ്ങനെ സംസ്കരിക്കാം
- ഒരു ലിറ്റർ വെള്ളത്തിൽ 30 ഗ്രാം ബ്ലീച്ചിങ് പൗഡർ കലക്കി അതിന്റെ തെളിവെള്ളത്തിൽ 20 മിനിറ്റ് മുക്കിവെച്ചാൽ പൂർണമായി രോഗാണുമുക്തമാകും. ഉപയോഗിച്ച ഡിസ്പോസിബിൾ മാസ്ക് ഇങ്ങനെ ചെയ്തശേഷം കുഴിച്ചുമൂടണം.
- പുനരുപയോഗിക്കുന്ന തുണികൊണ്ടുള്ള മാസ്കിനും ഇത് അവലംബിക്കാം. ഇല്ലെങ്കിൽ സോപ്പുലായനിയിൽ 20 മിനിറ്റ് പ്രത്യേകമായി മുക്കിവെച്ച ശേഷം വെയിലത്തിട്ട് ഉണക്കണം. ബ്ലീച്ചിങ് പൗഡർ ലായനിയാണ് കൂടുതൽ ഫലപ്രദം.
- മാസ്കുകളും ഗ്ലൗസുകളും ഉപയോഗ ശേഷം പല കഷണങ്ങളായി മുറിച്ച് 72 മണിക്കൂർ കടലാസിൽ പൊതിഞ്ഞുവെക്കാനാണ് കേന്ദ്ര മലിനീകരണ നിയന്ത്രണ ബോർഡിന്റെ പുതിയ മാർഗനിർദേശം. ഡിസ്പോസിബിൾ മാസ്കുകൾ ശേഖരിച്ച് വീണ്ടും വിപണിയിൽ എത്തിക്കാതിരിക്കാനാണിത്.
വഴിയോരങ്ങളിൽ നിന്നും മറ്റും മാലിന്യം ശേഖരിക്കുന്ന ശുചീകരണ തൊഴിലാളികളാണ് ഇത്തരത്തിൽ ഉപേക്ഷിക്കപ്പെട്ട മാസ്കുകളുടെ ദുരിതമനുഭവിക്കുന്നത്. ആവശ്യം കഴിഞ്ഞ് മറ്റു മാലിന്യങ്ങൾക്കൊപ്പം ഡിസ്പോസിബിൾ മാസ്കുകളും മാലിന്യം ശേഖരിക്കാനെത്തുന്നവർക്ക് നൽകുന്നു. തുണികൊണ്ടുള്ള മാസ്കുകളും ഈ രീതിയിൽ ഉപേക്ഷിക്കുന്നുണ്ട്. അവർ ഇതറിയാതെ മാലിന്യം കൈകാര്യം ചെയ്യേണ്ടി വരുകയാണെന്ന് ഓർക്കുക. മാസ്ക് സംസ്കരണം ഓരോരുത്തരുടെയും ഉത്തരവാദിത്വമാണ്. അതിനാൽ നല്ലൊരു നാളെയ്ക്കായി നമ്മൾ തന്നെയാണ് മുൻകരുതലുകൾ സ്വീകരിക്കേണ്ടത്.
