പുറത്തു പോകുമ്പോള് പെര്ഫ്യൂം ഉപയോഗിക്കുന്നവരാണ് കൂടുതല് ആളുകളും. ഇതിനു പ്രധാന കാരണം നമ്മള് വിയര്പ്പ് നാറ്റത്തെ ഭയപ്പെടുന്നു എന്നതു തന്നെയാണ്. ഇക്കാലത്ത് മിക്കവരെയും അലട്ടുന്ന ഒരു പ്രശ്നമാണ് വിയര്പ്പ് നാറ്റം. വേനല് കാലമാണെങ്കില് പറയുകയും വേണ്ട. വിയര്പ്പു കാരണം ഉണ്ടാകുന്ന ബുദ്ധിമുട്ടുകള് കൂടും. എന്നാല് വിയര്പ്പിന് ഒരു ഗന്ധവുമില്ല എന്നതാണ് യാഥാര്ത്ഥ്യം. ശരീരം അമിതമായി ചൂടാകുന്നത് മൂലം ഉണ്ടാകുന്ന പ്രശ്നങ്ങള് ഒഴിവാക്കാനാണ് ചര്മത്തിലെ വിയര്പ്പു ഗ്രന്ഥികള് കൂടുതല് വിയര്പ്പ് ഉത്പാദിപ്പിക്കുന്നത്. ജലവും ലവണങ്ങളും അടങ്ങിയ വിയര്പ്പ് ചര്മോപരിതലത്തില് വ്യാപിച്ച് നനഞ്ഞ് അവിടെയുള്ള അഴുക്കും അണുക്കളുമായി പ്രവര്ത്തിക്കുമ്പോള് മാത്രമാണ് ദുര്ഗന്ധമുണ്ടാകുന്നത്.
ചില കാര്യങ്ങള് ശ്രദ്ധിച്ചാല് വിയര്പ്പില് നിന്നും ഒരു പരിധിവരെ രക്ഷനേടാന് സാധിക്കും. ശരീരത്തില് വെള്ളം കുടൂതല് ഉണ്ടെങ്കില് അത് ശരീര താപനില കുറയ്ക്കാന് സഹായിക്കുന്നു. അതുവഴി വിയര്പ്പിന്റെ അളവും നിയന്ത്രിക്കാം. ദിവസവും ആറുമുതല് എട്ടുഗ്ലാസ് വരെ വെള്ളം കുടിക്കുന്നത് ഏറെ നല്ലതാണ്. കാപ്പിയിലെ കഫീന് ആകാംക്ഷ വര്ധിപ്പിക്കുന്നു. ഇത് ശരീരം നന്നായി വിയര്ക്കാനിടയാക്കും. അതിനാല് കഫീനടങ്ങിയ ആഹാരം ഒഴിവാക്കുക. നന്നായി വേവിച്ച ഭക്ഷണങ്ങള്ക്ക് പകരം പഴങ്ങള് പച്ചക്കറികള്,എന്നിവ ധാരാളം കഴിക്കുക. കൂടാതെ ധാന്യാഹാരവും വിയര്പ്പ് കുറയ്ക്കുന്നതിന് സഹായിക്കുന്നു.
ചൂട് കാപ്പി, ചായ എന്നിവ കഴിക്കുന്നതിന് പകരം ഫ്രഷ് ജ്യൂസ്, തണുത്ത വെള്ളം എന്നിവ കുടിക്കുന്നത് ശരീരത്തിന്റെ ഊഷ്മാവ് നിയന്ത്രിക്കാന് സഹായിക്കും. ഇത് അമിത വിയര്പ്പ് ഒഴിവാക്കും. വിയര്പ്പ് നിയന്ത്രിക്കാന് പ്രകൃതിദത്തമായ ഒരു മാര്ഗമാണ് യോഗ. ഇത് വിയര്പ്പ് ഗ്രന്ഥികളെ തളര്ത്തുന്നത് വഴി അമിതമായി വിയര്ക്കുന്നത് ഒഴിവാക്കുന്നു. തണുത്ത വെള്ളത്തില് കുളിക്കുന്നതു ശീലമാക്കുക. നൈലോണ്, പോളിസ്റ്റര് വസ്ത്രങ്ങള് ഒഴിവാക്കി കോട്ടണ് വസ്ത്രങ്ങള് ശീലമാക്കുക.
