കൊച്ചി: വിങ്ങര് താരമായ പ്രശാന്ത് കറുത്തേടത്ത്കുനിയുമായുള്ള കരാര് ഒരു വര്ഷത്തേക്ക് നീട്ടി കേരള ബ്ലാസ്റ്റേഴ്സ്. കോഴിക്കോട് നിന്നുള്ള 23കാരനായ താരം ഇന്ത്യന് സൂപ്പര് ലീഗിലെ വരുന്ന സീസണില് ടീമിന്റെ ഭാഗമായിരിക്കും.
വലത് കാലു കൊണ്ട് ചടുലമായ നീക്കങ്ങള് നടത്തുന്ന മിഡ് ഫീല്ഡര് ആയ താരം യഥാര്ത്ഥത്തില് അത്ലറ്റിക്സ് റണ്ണറായിരുന്നു. 2008 ല് ഫുട്ബോള് കളിക്കാന് തുടങ്ങി. എഐഎഫ്എഫ് റീജിയണല് അക്കാദമി തെരഞ്ഞെടുക്കുന്നതിന് മുന്പ് കേരള അണ്ടര് 14 ടീമിനെ പ്രതിനിധീകരിച്ചു. എ.ഐ.എഫ്.എഫ് എലൈറ്റ് അക്കാദമിയിലേക്ക് പോകുന്നതിനു മുന്പ് ഡി.എസ്.കെ ശിവാജിയന്സ് അക്കാദമിയുടെ ഭാഗമായിരുന്നു പ്രശാന്ത്.
പരിശീലനം ലഭിക്കുന്നതിന് വേണ്ടി ഐ ലീഗ് ചെന്നൈ സിറ്റി എഫ്സിക്ക് കൈമാറുന്നതിന് മുന്പായി 2016ലാണ് കേരള ബ്ലാസ്റ്റേഴ്സ് പ്രശാന്തുമായി കരാറില് ഏര്പ്പെടുന്നത്. ഐ എസ് എല്ലിന്റെ കഴിഞ്ഞ സീസണിലാണ് പ്രശാന്ത് മികച്ച പ്രകടനങ്ങള് നടത്തുന്നത്. 12 മാച്ചുകളില് വിങ്ങില് കളിച്ച താരം എഫ് സി ഗോവയുമായുള്ള നിര്ണായകമായ മത്സരത്തില് ഗോളടിക്കുന്നതിന് സഹായിക്കുകയും ചെയ്തു. അദ്ദേഹത്തിന്റെ സ്ഫോടനാത്മകമായ വേഗവും വിങ്ങിലെ മിന്നും പ്രകടനവും വരുന്ന സീസണില് ക്ലബ്ബിന് ഒരു മുതല്ക്കൂട്ടായിരിക്കും.
