ആന്ഫീല്ഡ്: ഇംഗ്ലീഷ് പ്രീമിയര് ലീഗില് നിലവിലെ ചാമ്പ്യന്മാരായ ലിവര്പൂളിന് വിജയത്തുടക്കം. സൂപ്പര് താരം മുഹമ്മദ് സലായുടെ ഹാട്രിക്കാണ് ലിവര്പൂളിന്റെ വിജയത്തില് നിര്ണായകമായത്. തുടക്കക്കാരായ ലീഡ്സ് യുണൈറ്റിഡിനെ മൂന്നിനെതിരെ നാല് ഗോളുകള്ക്കാണ് ലിവര്പൂള് മറികടന്നത്.
സ്വന്തം തട്ടകത്തില് അനായാസ ജയം തേടിയിറങ്ങിയ ക്ലോപ്പിനും സംഘത്തിനും കാര്യങ്ങള് അത്ര എളുപ്പമാകില്ലെന്ന് ആദ്യ 15 മിനിട്ടിനുള്ളില് തന്നെ മനസിലായിരുന്നു. നാലാം മിനിട്ടില് ലഭിച്ച പെനാള്ട്ടിയിലൂടെ സലാ ലിവര്പൂളിന്റെ ഗോളടിക്ക് തുടക്കം കുറിച്ചെങ്കിലും 12-ാം മിനിട്ടില് തന്നെ ജാക്ക് ഹാരിസണിലൂടെ ലീഡ്സിന്റെ മറുപടി ഗോളെത്തി. പിന്നീടങ്ങോട്ട് അടിയും തിരിച്ചടിയുമായി മത്സരം ആവേശത്തിലായി.
20-ാം മിനിട്ടില് വാന്ഡൈക്ക് ലിവര്പൂളിന്റെ ലീഡ് ഉയര്ത്തിയെങ്കിലും 10 മിനിട്ടിനു ശേഷം വീണ്ടും ലീഡ്സ് സമനില പിടിച്ചു. പാട്രിക് ബാംഫോര്ഡാണ് ഗോള് നേടിയത്. എന്നാല് വെറും മൂന്ന് മിനിട്ടിനുള്ളില് സലാ വീണ്ടും ഗോള് നേടി ലിവര്പൂളിനെ മുന്നിലെത്തിച്ചു. ഇതോടെ സംഭവബഹുലമായ ആദ്യ പകുതി 3-2ന് അവസാനിച്ചു.
രണ്ടാം പകുതിയിലും ലീഡ്സ് ആക്രമണം തുടര്ന്നു. 66-ാം മിനിട്ടില് ക്ലിച്ച് ലീഡ്സിന് വീണ്ടും സമനില സമ്മാനിച്ചു. സ്കോര് 3-3. ഇതോടെ ലിവര്പൂള് വിജയഗോളിനായി ശ്രമം ആരംഭിച്ചു. തുടര്ന്ന് 88-ാം മിനിട്ടില് ലഭിച്ച പെനാള്ട്ടിയിലൂടെ സലാ ഹാട്രിക് തികക്കുകയും ലിവര്പൂളിനെ വിജയിപ്പിക്കുകയും ചെയ്തു.
ആന്ഫീല്ഡില് 52 ശതമാനം സമയവും പന്ത് കൈവശം വെക്കുകയും ലിവര്പൂളിനെ വിറപ്പിക്കുകയും ചെയ്ത ലീഡ്സിന്റെ പ്രകടനം എടുത്തുപറയേണ്ടതാണ്. ലീഗില് പ്രശ്നങ്ങള് സൃഷ്ടിക്കാന് ലീഡ്സിനു കഴിയുമെന്ന് ലിവര്പൂള് പരിശീലകന് യൊഹാന് ക്ലോപ്പ് മത്സരശേഷം പ്രതികരിച്ചു.
Comments