കൊറോണയെ തുടർന്ന് വീട്ടിലിരിപ്പ് തുടങ്ങിയതിൽപ്പിന്നെ കുട്ടികളിൽ മടി വളരാൻ സാദ്ധ്യത ഏറെ കൂടുതലാണ്. വീട്ടിൽ നിന്ന് പുറത്തിറങ്ങി കൂട്ടുകാരോടൊത്ത് കളിക്കാൻ കഴിയാത്ത സാഹചര്യത്തിൽ കുട്ടികൾക്കെല്ലാം ഓൺലൈൻ ക്ലാസ്സുകളുമായി വീട്ടിൽ തന്നെ ചടഞ്ഞുകൂടിയിരിക്കേണ്ട അവസ്ഥയാണ്.
ഓടിച്ചാടി കളിച്ചു നടക്കേണ്ട പ്രായത്തിൽ വീട്ടിൽ തന്നെ ഇരിക്കുമ്പോൾ കുട്ടികളിൽ ഒരു മടുപ്പ് അനുഭവപ്പെടും. ഒന്നിനോടും താല്പര്യമില്ലായ്മ, എല്ലാത്തിനോടുമുള്ള ഒരു മടി തുടങ്ങിയ സ്വഭാവങ്ങൾ അവരിൽ ഉണ്ടാകുന്നു. അതുകൊണ്ട് തന്നെ വീട്ടിൽ ആണെങ്കിലും അവരെ ചുറുചുറുക്കുള്ളവരാക്കാൻ എല്ലാ രക്ഷിതാക്കളും ശ്രദ്ധിക്കേണ്ടതുണ്ട്.
അതിനായി അവരെ അത്യാവശ്യം വീട്ടുജോലികൾ ഏൽപ്പിക്കുക. ഭാരിച്ച ജോലികളല്ലാതെ അവർക്ക് ചെയ്യാൻ കഴിയുന്ന ജോലികളെല്ലാം കുട്ടികൾക്ക് കൊടുക്കുക. ഇത് അവരിൽ വീടിനോടുള്ള ഉത്തരവാദിത്തബോധം വളർത്താൻ സഹായിക്കും. അതുപോലെ എത്ര തിരക്കുണ്ടെങ്കിലും മാതാപിതാക്കൾ കുട്ടികൾക്കായി കുറച്ച് സമയം മാറ്റിവെക്കണം. അവരോട് വിശേഷങ്ങൾ ചോദിക്കുക, അവരുമായി പുതിയ ആശയങ്ങൾ പങ്കുവെയ്ക്കുക, വീട്ടിൽ തന്നെ അവരോടൊപ്പം കളിയ്ക്കാൻ കൂടുക. ഇത് കുട്ടികളിൽ ഒരുപാട് സന്തോഷമുണ്ടാക്കും.
പാഠ്യേതര വിഷയങ്ങൾ അല്ലാതെ കുട്ടികളുടെ മറ്റ് താല്പര്യങ്ങളും തിരിച്ചറിയാൻ ശ്രമിക്കുക. അവരുടെ കഴിവുകൾക്കും, താല്പര്യങ്ങൾക്കും പ്രോത്സാഹനം കൊടുക്കുക. ഓരോ ദിവസവും പുതിയ ആശയങ്ങൾക്കും പുതിയ പരീക്ഷണങ്ങൾക്കും അവരെ പ്രചോദിപ്പിക്കുക. സ്കൂൾ ഇല്ലെങ്കിലും കൃത്യമായ ചിട്ടയോടെ ദിവസവും കുട്ടികളെ കൊണ്ട് കാര്യങ്ങൾ ചെയ്യിപ്പിക്കുക. ഓരോ നിമിഷവും വിലപ്പെട്ടതാണെന്ന് അവരെ പറഞ്ഞു മനസിലാക്കുക. ഫോണും കംപ്യൂട്ടറുകളുമെല്ലാം ആവശ്യത്തിന് മാത്രം കൊടുക്കുക. അതിനു അടിമയാകുന്ന ഒരു സാഹചര്യം ഉണ്ടാകാതെ സൂക്ഷിക്കുക. ഓരോ കുട്ടികളും നാളത്തെ തലമുറയുടെ വാഗ്ദാനങ്ങളാണ്, ഈ ലോകത്തിനുതന്നെ മികച്ച സംഭാവനകൾ നൽകാൻ കഴിവുള്ളവർ. അതുകൊണ്ട് അവരെ മടിയന്മാരാക്കാതെ, മിടുമിടുക്കരാക്കാം.
Comments