കുട്ടിക്കാലത്തോളം നല്ലൊരു കാലം വേറെയുണ്ടാവില്ല. അച്ഛന്റേയും അമ്മയുടേയും ചിറകിലൊതുങ്ങി കളിച്ച് ഉല്ലസിച്ച് നടക്കുന്ന ഒരു മനോഹര കാലം. കുഞ്ഞിലേ പഠിക്കുന്ന കാര്യങ്ങളൊന്നും മറക്കില്ല എന്ന് പഴമക്കാർ പറയാറുണ്ട്. അതുകൊണ്ട് കുട്ടികളുടെ കളിയുടേയും ചിരിയുടേയും ഒപ്പം ചെറുപ്പത്തിലേ അറിവിന്റെ വാതിൽ കൂടി അവർക്കു മുൻപിൽ തുറന്നുകൊടുക്കേണ്ടത് മാതാപിതാക്കളുടെ കടമയാണ്. അതിന് വായന തന്നെയാണ് ഏറ്റവും നല്ല മാർഗം.
വായനാശീലം ചെറുപ്പത്തിലേ വളർത്തിയെടുക്കുന്നതുകൊണ്ട് അറിവിന്റെ ഒരു പുതുലോകം കുട്ടികൾക്ക് മുൻപിൽ സൃഷ്ടിക്കാനാവും. വായനയിലൂടെ പുതിയ കാഴ്ചകളും ഭാവനകളും അവരിൽ വിടരും. ഇത് അവരെ ചിന്തിപ്പിക്കാൻ പഠിപ്പിക്കും, സംശയങ്ങൾ ജനിപ്പിക്കും. അങ്ങനെ കൂടുതൽ കാര്യങ്ങൾ പറഞ്ഞും കേട്ടും അറിവിന്റെ വിശാലമായ ലോകത്തേക്ക് അവർ എത്തും. വായനയോടൊപ്പം തന്നെ അവരെ സംസാരിക്കുവാനും പ്രോത്സാഹിപ്പിക്കുക. മാതാപിതാക്കളായിട്ടുള്ള സംഭാഷണങ്ങൾ ദിവസവും ഉണ്ടാകണം. എത്ര തിരക്കാണെങ്കിലും കുട്ടികൾക്ക് പറയാനുള്ളതും കേൾക്കണം. ഇതിലൂടെ അവരിൽ ആത്മവിശ്വാസം വളർത്തും.
വായന നല്ലതാണെന്ന് വിചാരിച്ച് അവരെ പുസ്തകപ്പുഴു മാത്രം ആക്കരുത്. കുട്ടികളെ പുറത്തു കൊണ്ടുപോകണം, ആളുകളുമായി ഇടപഴകുവാനുള്ള അവസരം ഒരുക്കണം. മറ്റു കുട്ടികളുമായി കളിക്കുവാൻ അനുവദിക്കണം. നല്ല സൗഹൃദങ്ങൾ സൃഷ്ടിക്കാൻ അവരെ പ്രാപ്തരാക്കാം. അതുപോലെ സമൂഹത്തിൽ നടക്കുന്ന കാര്യങ്ങൾ അവരും അറിയണം, സാമൂഹികമായ കഴിവുകൾ വളർത്തിയെടുക്കാൻ ഇത് സഹായിക്കും. പഠനം, വായന തുടങ്ങിയവ ഒരിക്കലും കുട്ടികളിൽ ഒരു ഭാരമായി അടിച്ചേൽപ്പിക്കരുത്. ഏതു കാര്യം ചെയ്യുമ്പോഴും ഇഷ്ടപ്പെട്ടു ചെയ്യണം. അതുകൊണ്ട് പുതിയ ആശയങ്ങൾ, സ്കൂളിലെ പഠനവിഷയങ്ങളെല്ലാം വളരെ ലളിതമായി പറഞ്ഞു കൊടുക്കുക. പുതിയ അറിവുകളും കാഴ്ചകളും കുട്ടികളിൽ അനുഭവ സമ്പത്ത് വളർത്തുവാൻ സഹായിക്കും.
