ഉറുമി , ഉസ്താദ് ഹോട്ടൽ , പ്രാണ തുടങ്ങിയ ചിത്രങ്ങളിലൂടെ മലയാള സിനിമ പ്രേക്ഷകരുടെ മനസ്സിൽ ഇടം നേടിയ നിത്യ മേനോൻ മറ്റൊരു വ്യത്യസ്ത ചിത്രവുമായി വീണ്ടും എത്തുന്നു . ഗമനം എന്ന ബഹുഭാഷാ ചിത്രത്തിൽ ശൈലപുത്രി ദേവി എന്ന പാട്ടുകാരി ആയിട്ടാണ് നിത്യ മേനോൻ വീണ്ടും എത്തുന്നത് . ചിത്രത്തിൽ നിത്യ മേനോനൊപ്പം ശ്രിയ ശരണും പ്രധാന വേഷത്തിൽ എത്തുന്നു .സംസാര ശേഷിയില്ലാത്ത വ്യക്തിയായിട്ടാണ് ശ്രിയ ശരൺ ഈ ചിത്രത്തിൽ അഭിനയിക്കുന്നത് .
ചിത്രത്തിന്റെ പോസ്റ്റർ തെലുങ്കു നടനായ ശർവാനന്ദ് സെപ്റ്റംബർ പതിനെട്ടാം തീയതി പുറത്തിറക്കി . നിത്യ മേനോൻ മഞ്ഞ സാരിയും പച്ച എംബ്രോയിഡറി ചെയ്ത ബ്ലൗസും അണിഞ്ഞു ഒരു വേദിയിൽ കർണാട്ടിക് സംഗീതം ആലപിക്കുന്നതായിട്ടാണ് പോസ്റ്റർ പുറത്തിറക്കിയിരിക്കുന്നത് . കുറച്ചു ദിവസങ്ങൾക്ക് മുൻപ് പരമ്പരാഗത രീതിയിൽ ചുവന്ന സാരി ധരിച്ച ശ്രിയ ശരണിന്റെ ചിത്രവുമായി ഗമനത്തിന്റെ ഫസ്റ്റ് ലുക്ക് പോസ്റ്റർ അണിയറ പ്രവർത്തകർ പുറത്തിറക്കുകയുണ്ടായി .
പുതുമുഖം ആയ സുജന റാവുവാണ് ചിത്രത്തിന്റെ സംവിധായകൻ . അദ്ദേഹം തന്നെയാണ് ചിത്രത്തിനു കഥയും തിരക്കഥയും ഒരുക്കിയിരിക്കുന്നത് . യഥാർത്ഥ ജീവിതത്തിൽ നടന്ന ഒരു സംഭവമാണ് ചിത്രത്തിന്റെ പ്രമേയം .ചിത്രത്തിന് വേണ്ടി സംഭാഷണം എഴുതുന്നത് എഴുത്തുകാരനായ സായ് മാധവ് ബുറ ആണ് .ഇളയരാജയാണ് ചിത്രത്തിന് വേണ്ടി സംഗീത സംവിധാനം നിർവഹിക്കുന്നത് . ചിത്രത്തിന്റെ ഛായാഗ്രാഹകൻ ശേഖർ വി എസ് ആണ് .
രമേശ് കരുതുരി, വെങ്കി പുഷദാപു, ജ്ഞാന ശേഖർ വി.എസ് എന്നിവർ ആണ് ചിത്രത്തിന്റെ നിർമ്മാണം നിർവഹിക്കുന്നത് .ചിത്രം തെലുങ്ക്, തമിഴ്, കന്നഡ, മലയാളം, ഹിന്ദി ഭാഷകളിൽ ഒരേസമയം റിലീസ് ചെയ്യുവാനാണ് നിശ്ചയിച്ചിരിക്കുന്നത് .
ഗമനം എന്ന ചിത്രത്തിന്റെ ചിത്രീകരണം പൂർത്തിയായതായും പോസ്റ്റ്-പ്രൊഡക്ഷൻ ജോലികൾ നടന്നുവരികയാണെന്നും സിനിമയുമായി ബന്ധമുള്ള അടുത്ത വൃത്തങ്ങൾ വെളിപ്പെടുത്തുകയുണ്ടായി .
Comments