ആഗസ്റ്റ് 15നാണ് 2020 മോഡൽ മഹീന്ദ്ര ഥാർ അവതരിപ്പിച്ചത്. ഗാന്ധിജയന്തി ദിനത്തിൽ വില പ്രഖ്യാപിക്കുകയും വിൽപന ആരംഭിക്കുകയും ചെയ്യുന്ന പുത്തൻ ഥാറിനെ ആദ്യം സ്വന്തമാക്കാൻ ആഗ്രഹിക്കുന്നവർ ലേലം വിളിയിൽ പങ്കെടുക്കണം എന്നാണ് പുതിയതായി വരുന്ന റിപ്പോർട്ടുകൾ.
2020 മോഡൽ മഹീന്ദ്ര ഥാർ സ്വന്തമാക്കിയ സന്തോഷം മാത്രമായിരിക്കില്ല ആദ്യ ഉടമസ്ഥനെ തേടിയെത്തുക. അദ്ദേഹം നൽകുന്ന ലേലത്തുക കൊറോണ പ്രതിരോധ പ്രവർത്തനങ്ങൾക്കായി നൽകും. പി എം കെയേഴ്സ് ഫണ്ട്, സ്വദേശ് ഫൗണ്ടേഷൻ, നന്ദി ഫൗണ്ടേഷൻ എന്നിവയിൽ ഏതെങ്കിലും ഒന്നിലേക്കാണ് ലേലത്തുക കൈമാറുക. ഏതിലേക്ക് നൽകണം എന്നത് ലേലത്തിൽ വിജയിച്ച വ്യക്തിക്ക് തീരുമാനിക്കാം.
ഈ മാസം 24 മുതൽ 27 വരെ നടക്കുന്ന ലേലത്തിൽ LX ട്രിം അടിസ്ഥാനമായ 2020 ഥാർ ആണ് വെയ്ക്കാൻ ഉദ്ദേശിക്കുന്നത്. ഓൺലൈൻ വഴിയാണ് ലേലം സംഘടിപ്പിക്കുന്നത്.
ആദ്യ 2020 മഹീന്ദ്ര ഥാറിൽ ഡാഷ് ബോർഡിൽ ആദ്യ ഥാർ എന്ന് സൂചിപ്പിക്കുകയും കൂടാതെ ഉടമയുടെ പേരിന്റെ ആദ്യാക്ഷരങ്ങളും അതിനോടൊപ്പം ചേർക്കുമെന്നും കമ്പനി അറിയിച്ചു. ലെതറേറ്റ് സീറ്റുകളും ആദ്യ ഥാറിൽ സൗജന്യമായി ലഭിക്കും. ഹാർഡ് ടോപ്പ്, സോഫ്റ്റ് ടോപ്പ് എന്നിവയിൽ ഏത് വേണം എന്നത് ഉടമയ്ക്ക് തിരഞ്ഞെടുക്കാം.
ഥാർ മോഡലിൽ ആദ്യമായി പെട്രോൾ എഞ്ചിൻ വരുന്നു എന്നതും ഥാർ 2020 മോഡലിനെ വ്യത്യസ്തമാക്കുന്നു. ഒന്നാം തലമുറയിലെ മോഡലിൽ നിന്ന് ധാരാളം മാറ്റങ്ങൾ ഈ മോഡലിൽ ഉണ്ടെങ്കിലും വൃത്താകൃതിയിലുള്ള ഹെഡ് ലാമ്പ്, ബോക്സി രൂപം, സ്പെയർ വീൽ എന്നിവ ഈ മോഡലിലും കാണാൻ സാധിക്കും.
ഇൻഫോടെയിന്മെന്റ് സ്ക്രീൻ, റൂഫ് മൗണ്ട്ട് സ്പീക്കറുകൾ, സ്പ്ലാഷ് പ്രൂഫ് സ്വിച്ചുകൾ എന്നിവ ഉൾപ്പെടുത്തിയിട്ടുള്ള 2020 മഹീന്ദ്ര ഥാർ മോഡൽ ആദ്യം സ്വന്തമാക്കുന്നത് ആര് എന്ന് കാത്തിരുന്ന് കാണാം.
Comments