ഭൂമിയുടെ അവകാശികൾ മനുഷ്യർ മാത്രമല്ല, എല്ലാ ജീവികൾക്കും ഭൂമിയിൽ തുല്യ അവകാശമുണ്ടെന്ന് കുട്ടികളെ പറഞ്ഞു ബോധിപ്പിക്കേണ്ടത് മാതാപിതാക്കളുടെ കടമയാണ്. അതിനു ഏറ്റവും നല്ല മാർഗ്ഗം അവർക്കായി ഒരു ഓമന വളർത്തു മൃഗത്തെ നൽകുക എന്നതാണ്. ഇതിലൂടെ കുട്ടികളിലെ സഹജീവി സ്നേഹം വളർത്തിയെടുക്കാനാകും. മൃഗങ്ങളെ പൊതുവെ ഒരു ശല്യമായാണ് എല്ലാവരും കരുതുന്നത്. എന്നാൽ കുട്ടികളെ സംബന്ധിച്ചിടത്തോളം മൃഗങ്ങൾ വീട്ടിലൊരു കൂട്ടാണ്. അവരെ പരിചരിക്കാനും അവരുടെ കൂടെ കളിക്കുവാനുമൊക്കെ കുട്ടികൾക്ക് ഇഷ്ടമായിരിക്കും.
മൃഗ പരിചരണം കുട്ടികളെ ഏൽപ്പിക്കുമ്പോൾ അവരുടെ കാര്യങ്ങൾ നോക്കുവാനുള്ള ചുമതല കുട്ടികളിൽ വർധിക്കും. മാത്രവുമല്ല മൃഗങ്ങളെ കാണുമ്പോൾ അവയെ ഉപദ്രവിക്കുവാനുള്ള പ്രവണതയും കുറഞ്ഞു കിട്ടും. താൻ വളർത്തുന്ന മൃഗങ്ങൾക്ക് ഭക്ഷണം കൊടുക്കുവാനും അവരെ കുളിപ്പിക്കുവാനുമൊക്കെ പ്രത്യേക താല്പര്യം കുട്ടികളിൽ ഉണ്ടാക്കും. മാത്രവുമല്ല കൊറോണ കാരണം ഇപ്പോൾ കുട്ടികൾ മുഴുവൻ സമയവും വീട്ടിൽ തന്നെയാണ്. മൊബൈലും ലാപ്ടോപ്പും ആണ് അവരുടെ പ്രധാന നേരമ്പോക്ക്. അപ്പോൾ ഒരു വളർത്തു മൃഗം ഉണ്ടായാൽ മൊബൈൽ പോലുള്ള സാങ്കേതിക വിദ്യകളുടെ അമിതമായ ഉപയോഗത്തിൽ കുറവ് വരും.
അതുപോലെ തന്നെ വീട്ടിനുള്ളിൽ നിന്ന് കുട്ടികൾക്ക് ഒരു കൂട്ടുണ്ടാവുകയും ചെയ്യും. അവയോടൊപ്പം കളിച്ചുചിരിച്ചു നടക്കുമ്പോൾ ശാരീരിക വ്യായാമം ഉണ്ടാകുകയും, ഒപ്പം വീടിനുള്ളിലെ മടുപ്പ് ഇല്ലാതാക്കുകയും ചെയ്യുന്നു. ഓരോ കുട്ടിയിലും സഹജീവി സ്നേഹം വളർത്തിയെടുക്കാനായാൽ സമൂഹ സ്നേഹമുള്ള നല്ലൊരു തലമുറയെ വാർത്തെടുക്കാനാകും. സമൂഹത്തിനോടുള്ള ഒരു കടമയും ഇവരിൽ എന്നും ഉണ്ടാകും. അതുകൊണ്ട് വീട്ടിൽ ഒരു വളർത്തു മൃഗം ഉള്ളത് കുട്ടികളിൽ ഒരുപാട് ഗുണങ്ങൾ ചെയ്യുമെന്നാണ് പഠനങ്ങൾ പറയുന്നത്.
Comments