ദോശക്കും ഇഡലിക്കുമൊപ്പം മിക്കവാറും നമ്മൾ കഴിക്കുന്നത് സാമ്പാറോ , തേങ്ങ ചമ്മന്തിയോ , മുളക് ചമ്മന്തിയോ , തക്കാളി ചമ്മന്തിയോ ,ചമ്മന്തിപൊടിയോ ഒക്കെയാണ് . എന്നാൽ ഇതിൽ നിന്നെല്ലാം വ്യത്യസ്തമായി എളുപ്പത്തിൽ തയ്യാറാക്കാവുന്ന രുചികരമായ ഒരു വിഭവമാണ് സവാള നിലക്കടല ചമ്മന്തി .
സവാള നിലക്കടല ചമ്മന്തി ഉണ്ടാക്കുവാൻ വേണ്ടുന്ന വിഭവങ്ങൾ
1 . ഒരു കപ്പ് സവാള അരിഞ്ഞത്
2 . അര കപ്പ് വറുത്ത നിലക്കടല തൊലി കളഞ്ഞത്
3 . നാല് വറ്റൽ മുളക്
4 . രണ്ട് ടീസ്പൂൺ വെളിച്ചെണ്ണ
5 . അല്പം പുളി
6 . ഉപ്പ് ആവശ്യത്തിന്
7 . രണ്ട് അല്ലി വെളുത്തുള്ളി
8 . അര ടീസ്പൂൺ കടുക്
9 . അര ടീസ്പൂൺ ഉഴുന്ന് പരിപ്പ്
10 . സ്വല്പം കായപ്പൊടി
11 . കറിവേപ്പില ആവശ്യത്തിന്
സവാള നിലക്കടല ചമ്മന്തി തയ്യാറാക്കുന്ന വിധം
1 . ഒരു ചീനച്ചട്ടിയിൽ വെളിച്ചെണ്ണ ഒഴിച്ച് ചൂടായതിന് ശേഷം അരിഞ്ഞു വെച്ചിരിക്കുന്ന സവാള , വെളുത്തുള്ളി , വറ്റൽ മുളക് എന്നിവ വഴറ്റുക . സവാള നന്നായി വഴന്നതിന് ശേഷം അടുപ്പത്ത് നിന്ന് വാങ്ങി തണുക്കാൻ വെക്കുക .
2 . വഴറ്റിയ സവാള , വറ്റൽ മുളക് , വെളുത്തുള്ളി മിശ്രിതവും , പുളിയും , തൊലി കളഞ്ഞു വെച്ചിരിക്കുന്ന നിലക്കടലയും , ആവശ്യത്തിന് ഉപ്പും , വെള്ളവും ചേർത്ത് നന്നായി അരച്ചെടുക്കുക .
3 . ചീനച്ചട്ടി ചൂടാക്കിയതിന് ശേഷം വെളിച്ചെണ്ണ ഒഴിച്ച് ചൂടായി കഴിയുമ്പോൾ കടുക് ഇടുക . കടുക് പൊട്ടി കഴിയുമ്പോൾ അല്പം കറിവേപ്പില , ഉഴുന്ന് പരിപ്പ് എന്നിവ കൂടി ചേർത്ത് ഇളക്കുക . ഇതിലേക്ക് അരച്ച് വെച്ചിരിക്കുന്ന മിശ്രിതം ചേർത്തിളക്കുക . ചെറുതായി തിള വന്നു കഴിയുമ്പോൾ അടുപ്പിൽ നിന്ന് വാങ്ങുക .
ദോശക്കും ഇഡലിക്കും ഒപ്പം വിളമ്പാവുന്ന രുചികരമായ സവാള നിലക്കടല ചമ്മന്തി തയ്യാർ .
Comments